Hebdomada Papae, o boletim em latim do Vatican News

“HEBDÓMADA PAPAE”

Notítiae Vaticánae Latíne rédditae

Die duodetricésimo mensis Augústi anno bis millésimo vicésimo primo

(TÍTULI)

Francíscus Póntifex in Audiéntia generáli die Mercúrii hypocrísim palam repudiávit. Quod ádmodum detestándum virus designávit, cum in Ecclésia accídit.

“Timeámus si Deus in discrímen nos non addúcat…”. Hoc est Summi Pontíficis mónitum, ex catechési deprómptum precatiónis quae est Ángelus diéi domínicae praetéritae.

Francíscus ducénta mília eurórum misit ut Haitiánae genti subvenirétur: quod est prǽvium subsídium primi témporis post terrae motum in ínsula Caraíbica.

Salútem plúrimam ómnibus vobis auscultántibus dicit Philíppus Herrera-Espaliat et felíciter vobis audiéntibus novos núntios Latína lingua prolátos.

(NOTÍTIAE PRAECÍPUAE)

Hypócrisis princeps est verbum catechésis quod Francíscus Póntifex die Mercúrii apud Áulam Páuli Sexti, in Audiéntia generáli, enuntiávit. Sic Póntifex suam meditatiónem de epístula Sancti Páuli ad Gálatas praebére pergit. Refert Olga Sakun.

Inter fidem et Legem compléndam necessitúdo fuit arguméntum continuátum catechésis novissimárum hebdomadárum. Postquam de necessitáte est locútus nostrae religiónis per filiórum Dei libertátem experiéndae, Francíscus mónuit ut caveámus ne agámus nostram germánam cogitatiónem abscondéntes ideóque nostram identitátem, id est, ut veri hypócrites faciéntes. “Quid est hypócrisis?”, percontátus est Póntifex, atque explanávit hypocrísim veritátis esse metum: ipsa éfficit ut fingámus pótius quam nos ipsi simus. Véluti ánimam fucámus, mores nostros fucámus, agéndi modum fucámus: non est véritas. De hábitu ágitur qui est tamquam virus, quod in óperis loco reperíri potest ac saepenúmero in re política. Sed in Ecclésia quoque inveníri potest et in eius minístris: quod cum évenit, argumentátus est Francíscus Papa, id est ádmodum detestándum.

***

Precatiónis dominicális témpore quae est Ángelus, Francíscus Papa mónuit ne scándalum admíttere deberémus de incarnatiónis mystério, id est, eo quod in humánis infirmitátibus manifestátur Deus. Id Márius Galgano.

In memóriam illud révocans quod multi discípuli Iesum deseruérunt, postquam sermónem de Pane Vitae audiérunt, Póntifex eos compellávit qui adnúere nolunt sumpsísse Deum humánam fragilitátem. Ad Pontíficis mentem ex hoc conséquitur omnes fidéles ut Iesum fíeri debére, a se discedéntes, offeréntes pro áliis próprium ob amórem sacrifícium. Haec personális oblátio cum Christi oblatióne néctitur atque refértur ad panem fractum in Eucharístia. Attámen hóminis cor ob sui amórem obsístit eíque discrímen ínfert quod fructuosíssimum esse potest. Idcírco Francíscus dixit nos timére debére, si Iesus in discrímen nos haud ducat, quóniam fortásse eius núntium dilúimus.

(NOTÍTIAE BREVÍSSIMAE)

Summus Póntifex primum subsídium duórum mílium eurórum prǽbuit ut Haitiánae genti subvenirétur post magnum terrae motum in meridiána Natiónis parte, unde plus quam duo mília hómines interiérunt ac ingens vastátio est consecúta. Francíscus suam proximitátem Caraíbicae ínsulae manifestávit sauciátae ac desértae, évocans item ácriter internationális communitátis solidarietátem.

Haec hactenus, íterum próxima hebdómada, Deo suffragánte, conveniémus.