Hebdomada Papae, o boletim em latim do Vatican News

“HEBDOMADA PAPAE”

Notitiae Vaticanae Latine redditae

Die vicésimo quinto mensis decémbris anno bis millésimo vicésimo primo

Titoli

Francíscus in Allocutióne ad Cúriam Románam: humílitas praecéptum est quod de Nativitáte venit.

Papa in Salutatióne Angélica domínicae quartae Advéntus: laetítiam Iesu afférre primum est actum caritátis.

Núntius Pontíficis pro Die mundiáli pacis: plura arma habéntur hódie quam belli frígidi témpore; fovéndae autem sunt ópera et institútio.

Ómnibus vobis cómiter salútem dicit Catharína Agorelius: optáti audiátis editiónem hanc nuntiórum latína língua prolatórum.

(TÍTULI)

Die vicésima tértia decémbris Papa Francíscus Cúriam Románam convénit ominórum Nativitátis causa. In Allocutióne sua locútus est de necessitáte concedéndi ut humilitáte Iesu Infántis evangelizémur. Ómnia refert Rosárius Tronnolone.

Uti quotánnis Póntifex convénit Cúriam Románam ominórum Nativitátis causa. Verbum «humilitátem» mystérii Nativitátis universalitátem significáre dixit Francíscus, e Libro Secúndo Regum narratiónem résumens Naamán Syri, qui ad sanándum morbum, quo corripiebátur, oportébat ut armatúram exúeret et in flúmine Iordáne sépties lavarétur. Hoc recordátur nobis – inquit Papa – Nativitátem tempus esse quo unusquísque nostrum opórtet áudeat vestes partis suae abícere, sociális scílicet recognitiónis, mundáne glóriae fulgóris, et se animadvértere interióris sanatiónis ínopem. Iter synodále ab Ecclésia incéptum cómmonens, Póntifex dixit «conversatiónem» humilitátis Cúriae Románae confiténdam esse ex participatióne, communióne et missióne.

Papa in Salutatióne Angélica domínicae quartae Advéntus christifidéles adhortátus est, ut, exémplum Maríae sectántes, iter praeparatiónis Nativitátis metiántur. Quae éxplicat Monia Parente:

In último Advéntus itíneris spátio sinámus duo motus Matris Iesu, ad cuius imitatiónem vocámur, nos dírigant: súrgere ac festinánter procédere. Haec suasit Póntifex in Salutatióne Angélica diéi undevicésimi decémbris coram innúmeris fidélibus in Foro Petriáno congregátis. Francíscus confirmávit: «Deus magnus est et ad erigéndos nos promptus, si manum ei porrígimus», hoc cómmonens, quod «si álios adiuvámus, nos ipsos adiuvábimus, ut e difficultátibus extollámur». In fine precatiónis mariális Francíscus Papa proximitátem suam pópulis Insulárum Philippinárum expréssit a ventórum procélla «Rai» nuncupáta vexátis, quae innúmeras effécit víctimas. Auxília certa et consolatiónem optávit spirituálem.

(NOTÍTIAE PRAECÍPUAE)

In Núntio pro Quinquagésimo Quinto Die mundiáli Pacis diéi primi Ianuárii anni bis millésimi vicésimi secúndi, die vicésimo primo decémbris iam vulgáto, Papa «exsurdántem» índicat clamórem bellórum et damna a pestiléntia universáli prodúcta, praesértim quae ad óperam dandam pértinent. Francíscus multórum iúvenum láudat stúdium caeli tuéndi atque adhortátur ut melióres fiant condiciónes migrántium qui óperi sunt inténti, servitúti vero obiciúntur et nulla públicae salútis tutéla defendúntur.

Haec ómnia sunt pro hac editióne; conveniémus íterum sábbato próximo, eádem hora.