O boletim de notícias em latim

“HEBDÓMADA PAPAE”

Notítiae Vaticánae Latíne rédditae

Die undetricésimo mensis Ianuárii anno bis millésimo vicésimo secúndo

(TÍTULI)

In domínica tértia témporis ordinárii ad Sacram Scriptúram fúnditus vestigándam dicáta, lectorátus et catechístae ministérium láicis, cum viris tum féminis, variárum Natiónum concrédidit Summus Póntifex.

Praetérito die Mercúrii, destináto ad pacem in Ucráina deprecándam, Francíscus rursus est cohortátus ut “ómnium bonum cómmodis paucórum anteferrétur”.

In anno iudiciáli Románae Rotae inaugurándo, postulávit Póntifex ut procéssibus iudiciálibus agéndis locus tribuerétur ad atténte auscultándum, neútiquam áutem ad praestitútas responsiónes.

Salútem plúrimam ómnibus vobis auscultántibus núntios Latína lingua prolátos dicit Philíppus Herrera-Espaliat.

(NOTÍTIAE PRAECÍPUAE)

Tres per contínuos annos Dei Verbi celebrátur Domínica, quam anno bismillésimo vicésimo instítuit Francíscus Papa. Cum missa hoc anno celebrarétur, lectoratus et catechístae ministérium sédecim láicis, cum viris tum féminis, commísit Póntifex. Réfert Alexánder de Carolis.

Quod Sacra Scriptúra in vita christiána príncipem óbtinet locum, id íterum iterúmque in eucharística celebratióne est confirmátum, ex qua Ecclésia cunctum Dei pópulum cohortátur ad Verbum peténdum. Dominicális celebratiónis témpore apud Papálem Basílicam Sancti Petri, per ritum quendam ad experiméntum comprobátum, Francíscus ut minístros lectóres constítuit duos viros ac sex féminas, et ut minístros catechístas, quinque viros et tres féminas. Primum láici hoc ministérium recepérunt, ex divérsis Natiónibus adveniéntes. Sui ipsórum offícii sicut signum, lectóres a Summo Pontífice Bíblia recepérunt, catechístae áutem crucem. In homília duo arguménta a Francíscus Papa sunt expósita: “Verbum Deum revélat, Verbum ad hóminem nos défert”.

Ex die destináto ad pacem in Ucráina deprecándam, íterum iterúmque suam īmam ánimi perturbatiónem osténdit Francíscus, quod ad condiciónes áttinet in illis locis Európae Septemtrionális. Audiámus Catherinam Agorelius.

Diem Mercúrii sextum et vicésimum elégit Francíscus Papa, ut oráret in Ucráina pro pace servánda. Contentiónes húius Natiónis cum Rússia effecérunt ut Summus Póntifex complúriens Natiónum potestátes monéret, ut quaedam reperírent ad bellum vitándum. Sic die Mercúrii Audiéntiae Generális sub finem, priúsquam Pater noster dicerétur atque concórdiae reconciliationísque memoraréntur benefícia, Póntifex inquit: “Instánter a Dómino flagitémus ut in regióne illa fratérnitas vigére possit et vúlnera, metus ac divisiónes superéntur”. Una simul cum fidélibus in Páuli sexti áula adstántibus, Francíscus Papa orávit et postulávit ut id totum per diem producerétur.

(NOTÍTIAE BREVÍSSIMAE)

Praelátos auditóres Rotae Románe die Iovis praetérito allóquens, ad annum inaugurándum eórum actiónis iudiciális, Francíscus Papa est cohortátus ut fidelitáte operositatéque renováta ecclesiále ministérium prosequeréntur, “iustítiae inserviéntes, quae a veritáte abstráhi nequit, ac tandem a salúte animárum”. Huc áddidit Póntifex quod hoc anno occásio praebétur synodalitátis meditándae de nullitátis matrimónii procéssibus”. Ex iudícibus ínsuper quaesívit Francíscus ut in iudiciálibus procéssibus locus tribuerétur ad atténte auscultándum, mínime vero ad praestitútas responsiónes.

Haec háctenus, próxima hebdómada, Deo suffragánte, íterum ad vos.