Hebdomada Papae, o boletim em latim do Vatican News

“HEBDÓMADA PAPAE”

Notítiae Vaticánae Latíne rédditae

Die undevicésimo mensis Mártii anno bis millésimo vicésimo secúndo

(TÍTULI)

Haec est Pontíficis senténtia: Ucraína et Sýria dolóre coniungúntur; Ecclésia spem diffúndit.

Pontíficis precátio pro infántibus puerísque Ucraínis, qui “supérbiam experiúntur”.

Die vicésimo quinto mensis Mártii Rússiam et Ucraínam Cordi Immaculáto Maríae consecrábit Póntifex.

Felícem exóptat diem Márius Galgano ómnibus haec verba, lingua Latína proláta, audiéntibus.

(NOTÍTIAE PRAECÍPUAE)

Per epístulam ad partícipes missam Congréssus, cuius arguméntum “Ecclésia caritátis domus – Synodálitas et ordinátio”, Damásci incoháti, Póntifex recordátur néminem maerórem oblivísci huius Natiónis ac synodalitátem ínsuper ad Ecclésiam diligéndam dúcere. Refert Olga Sakun.

Francíscus commonefácit hodie quoque in illa Natióne arma conférri, quae dolórem, “famem, mortem et continuátum discéssum Syrórum éfferunt, at non celat item “magnas contentiónes súscipi ut spes et futúrus prospéctus praebeántur iis qui mánent”. Ítaque e Congréssu – ut patefít – quaedam éxstat rátio ad Ecclésiae sollicitúdinem confirmándam de iis quae ferúntur, sed étiam ad synodalitátem collustrándam, quam Sanctus Páulus ut corpus ac membra descríbit. “Inter córporis membra audítus, communicátio, amor, mútuum subsídium adsunt atque potíssimum consciéntia singulórum múneris, quod quisque sustinére debet. Cum quaedam córporis pars pátitur, omnes céterae partes opem ferre próperant, eius dolóres participántes et cuncta suscipiéntes ut ii levéntur”.

Cum conveníret Francíscus Papa duo mília discipulórum Mediolanénsis Institúti, cuius títulus “La Zolla”, apud papálem Basílicam Sancti Petri, movéntem precatiónem dicit pro párvulis ac adolescéntibus Ucraínae “qui sub pyróbolis vitam agunt”. Refert Rosárius Tronnolone.

“Dómine Iesu, hos adolescéntes ínspice, bénedic, eósque tuére; ii nostrae adultórum supérbiae subiciúntur. Párvuli et adolescéntes Ucraíni, “qui sub pyróbolis vitam agunt, quique hoc bellum nefástum experiúntur, in corde sunt Francísci Papae, qui occúrsum ad finem addúcit die Mercúrii ante Audiéntiam Generálem apud papálem Basílicam Sancti Petri, cum convenísset duo mília discipulórum Mediolanénsis comprehensívi Instítuti “La Zolla”, fervéntes pro eis fundens preces.

(NOTÍTIAE BREVÍSSIMAE)

“Die Véneris quinto et vicésimo mensis Mártii, cum Paeniténtiae Celebrátio agétur, cui hora quinta post merídiem in papáli Basílica Sancti Petri praesidébit, Francíscus Papa Rússiam et Ucraínam Cordi Immaculáto Maríae consecrábit. Quod idem eódem die Fátimae a cardinále Conrádo Krajewski agétur, Eleemosynário Pontifício, a Sancto Patre misso”. Hac de re a Sedis Diurnariórum Sanctae Sedis moderatóre, Matthǽo Bruni, certióres sumus facti.

Haec háctenus, próxima hebdómada, quae eventúra.