Hebdomada Papae, o boletim em latim do Vatican News

“HEBDÓMADA PAPAE”

Notítiae Vaticánae Latíne rédditae

Die vicésimo sexto mensis Mártii anno bis millésimo vicésimo secúndo

(TÍTULI)

In Audiéntia Generáli Póntifex ait: a bello nos servet Deus, solúmmodo est mors; nefásta cunctis infértur clades.

Francíscus in Precatióne Angélica: malum hauquáquam ex Deo óritur, sed ex hóminum peccátis.

Nova promulgátur de Cúria Constitútio, cuius títulus “Praedicáte Evangélium”.

Salútem plúrimam ómnibus vobis auscultántibus dicit Catharína Agorelius et bene felicitérque sit vobis audiéntibus núntios Latína lingua prolátos.

(NOTÍTIAE PRAECÍPUAE)

Cum Audiéntiae Generáli finis die tértio et vicésimo mensis Mártii imponerétur, rursus de Ucraína locútus est Póntifex, pyróbolis vastáta, Ipséque cohortátus est ut die vicésimo quinto mensis Mártii commúniter preces funderéntur, ad “pacis donum” peténdum. Refert Alexánder de Carolis.

Ántequam Audiéntiae Generális finis fíeret die tértio et vicésimo mensis Mártii, quaedam moménta dicávit Póntifex víctimis memorándis Belli Ucraíni. Mortis núntii ad nos pervéniunt de homínibus reiéctis vel fugiéntibus, de mórtuis, de sauciátis atque de tot homínibus ex utráque parte qui interiérunt: “In bello abest victória, ómnia décidunt”. Francíscus cohortátus est étiam ad orándum, “ut Natiónum rectóres intellégerent rem non solvi per arma empta ac per arma fabricáta”, fidéles simul vocans die vicésimo quinto mensis Mártii ad preces simul funderéndas, Ucraínam et Rússiam Cordi Immaculáto Maríae consecratúrus, quae “univérso terrárum orbi áfferret pacem”.

In Angélica Salutatióne die vicésimo mensis Mártii asséruit Francíscus Papa nostra erráta quae elégimus et violéntias malum inférre quaeque per conversiónem solvi. Lóquitur Olga Sakun.

In Evangélio die vicésimo mensis Mártii planum facit Iesus calamitátes et incómmoda Deo non esse tribuénda. Eádem ópera in Salutatióne Angélica Póntifex opiniónem reprobávit nostra mala Deo tribuéndi.

“Peccátum mortem éfficit”, autumávit, “quae erráta elígimus et quae ex vi fácimus secum ferunt malum”. Ad haec prorsus solvénda opus est conversióne. Quod conclúdens, iterávit Póntifex “Deum prope esse”, misericórdem ac lenem. Post Angélicam Maríae precatiónem, dénuo animóse cohortátus est ut in Ucraína bello finis imponerétur, quod vocávit “stólidam caedem”cui nulla tribúitur rátio.

(NOTÍTIAE BREVÍSSIMAE)

Diutúrnam post comparatiónem, die undevicésimo mensis Mártii, in Sollemnitáte Sancti Ioseph nova Constitútio apostólica de Cúria Romána eiúsque erga Ecclésiam ac mundum famulátu, cúius títulus “Praedicáte Evangélium”, édita est. Quae die quinto próximi mensis Iúnii, in Sollemnitáte Pentecóstes, vim obtinébit.

Féria sexta in Parascéve Via Crucis, Pontífice adstánte, dénuo apud Colosséum fiet. Postrémis duóbus annis, cum virus coronárium ingrúeret, ritus in Foro Petriáno est celebrátus.

Haec páucis verbis, próxima hebdómada íterum ad vos.