Hebdomada Papae: as notícias da semana em latim

“HEBDÓMADA PAPAE”

Notítiae Vaticánae Latíne rédditae

Die séptimo mensis Máii anno bis millésimo vicésimo secúndo

(TÍTULI)

Maríae pacem in Európa commendámus, ait Póntifex.

Convéntio rata est de Helveticórum custódum castri renovándis.

Multum fídei cónferunt culturália bona, ínquit Francíscus Papa.

Salútem plúrimam ómnibus vobis auscultántibus núntios Latína lingua prolátos dicit Márius Galgano.

Ascolta l'edizione del Radiogiornale in lingua latina

(NOTÍTIAE PRAECÍPUAE)

Adstántes salútans in Audiéntia Generáli die Mercúrii, Francíscus Papa est cohortátus ut cotídie mense Máio Rosárii precátio dicerétur et a Vírgine María restituénda tranquíllitas peterétur Véteri continénti orbíque terrárum. Lóquitur Rosárius Tronnolone.

Non surgit Francíscus, quandóquidem ex genu labórat et in sella sedére cógitur, qui e contrário omnes salutáre summópere velit, quod semper dicit Audiéntiae Generáli finem impónens, spe ductus se ex hoc impediménto evasúrum. Sed procul dúbio id vult, ut hoc gestu quod in corde sentit comitétur, semper compúlsus ad discrímen, immo discrímina, in quibus terrárum orbis versátur, dissolvénda, qui bellis téritur et ut ab hiis deserátur, dum Maríam conspícimus, quam hoc mense assídue precámur. Haec Germánico coétui dicit, in Petriáno foro adstánti, quae vero véluti per gradus unicúique coétui hoc íterat, hoc comméndat.

Sollémnis iurisiurándi Helveticórum Custódum Pontificiórum per occasiónem, quod quoque commémorat centum quadragínta septem Helvéticos interémptos, Cleméntem séptimum tuéntes, “Románae interniciónis” témpore, apud Palátium Apostólicum Vaticánum, Convéntio rata est inter Secretáriam Status et “Opus Fundátum ad castra renovánda Helveticórum Custódum Pontificiórum Civitátis Vaticánae”. Refert Olga Sakun.

Die sexto mensis Máii, quo novi mílites iusiurándum nuncupárunt, Póntifex familiáres et Helveticárum potestátum partes geréntes convénit, qui grátias egit suis custódibus de ópere Ecclésiae prǽstito. Convéntio, hac hebdómada rata, subsignáta est a Cardinále Petro Parolin, Secretário Status Suae Sanctitátis atque a dóminis Ioánne-Petro Roth et Stéphano Kuhn, vidélicet prǽside et áltero a prǽside huius Óperis Fundáti. Praesédit étiam Dionýsius Knobel, Confoederatiónis Helvéticae apud Sanctam Sedem legátus. Licet de instruménto agátur quod iure non obstríngitur, Convéntio utriúsque partis voluntátem testátur, légibus Vaticánis et inter Natiónes servátis, Custódibus, eorúmque famíliis et iis qui vária ratióne ipsos iuvant, commodióra domicília suppeditándi ac terrárum orbi salubrióra. Ópera incohabúntur post finítum Iubilǽum anni bismillésimi vicésimi quinti, sub condicióne ut sumptus praestétur definíti incépti atque facultátes operándi cunctae sint concéssae.

(NOTÍTIAE BREVÍSSIMAE)

Institúta vitae consecrátae et Societátes vitae apostólicae dedérunt et dant óperam arti et cultúrae coléndae in fidei benefícium. Quod ásserit Francísci Papae núntius ad partícipes cuiúsdam disputatiónis de culturálibus bonis, quam comparavérunt Congregátio pro Institútis vitae consecrátae et Societátibus vitae apostólicae necnon Pontifícium Consílium de Cultúra, iuvántibus Conferéntia Episcopórum Itáliae, Pontifícia Universitáte Gregoriána et Studiórum Universitáte Bononiénsi.

Haec habúimus quae dicerémus. Próxime nova narrábimus.