Hebdomada papae, o boletim em latim do Vatican News

“HEBDÓMADA PAPAE”

Notítiae Vaticánae Latíne rédditae

Die nono mensis Iúlii anno bismillésimo vicésimo secúndo

(TÍTULI)

Francíscus Papa Missae praesédit pro Congénsi communitáte. Die domínico praetérito in Civitáte Vaticána de pace conciliánda in illa Africána Natióne est locútus.

Copiósam per percontatiónes responsionésque ad sedem nuntiórum, quae est Reuters, Póntifex dixit se de abdicatióne non cogitáre ac velle cito Ucraínam ac Rússiam adíre.

Núntio telegráphico suum maerórem osténdit Francíscus Papa propter cardinális Brasiliénsis Cláudii Hummes óbitum.

Salútem plúrimam ómnibus vobis auscultántibus dicit Philíppus Herrera-Espaliat et bene felicitérque sit vobis audiéntibus núntios Latína lingua prolátos.

(NOTÍTIAE PRAECÍPUAE)

Zairénsis ritus Missae in papáli Basílica Sancti Petri, die tértio mensis Iúlii, praesédit Francíscus Papa. Plus quam duo mília Congéntium hóminum sacram litúrgiam participárunt. Audiámus Mónia Parente.

Africánum iter différre coáctus, quod die áltero mensis Iúlii susceptúrus erat, Francíscus ex affectiónis testificatióne in Congénsem communitátem in papáli Basílica Sancti Petri pro Congénsi communitáte Romána Missae praesédit. Die quo Kinshásae futúrus erat, pacem ac reconciliatiónem in Rempúblicam Democráticam Congénsem afferéndam invocávit. Eláte palámque Summus Póntifex est cohortátus ad aviditátem arcéndam, occúltum ódium deponéndum et corruptélam fugiéndam, planum fáciens, si pax ex cuiúsque corde oriátur, societátem commutári posse. Celebratiónem collustrárunt colóres ac soni propri illíus Natiónis, lectiónes autem ac precatiónes lingua Itálica sunt enuntiátae atque quáttuor linguis, quibus útitur Congénsis pópulus.

Copiósam per percontatiónes responsionésque ad sedem nuntiórum, quae est Reuters, Póntifex váriis de arguméntis disséruit, a sanitáte usque ad feminárum in Ecclésia offícia. Dixit se de abdicatióne non cogitáre. Refert Márius Galgano.

Per nonagínta témporis moménta Francíscus Papa cum diurnário Ítalo Americáno Philíppo Pullella est sermocinátus, sua de valetúdine loquens. Áddidit quod genu coeptum est sanári, rumórem porro de ficto cancro exstínguit, quod superióre anno accídit, confírmans ínsuper se numquam de abdicatióne cogitásse. Francíscus quoque dixit se Suprémi Tribunális Foederatárum Civitátum Américae Septentrionális de abórtu senténtiam observáre atque suam praegnatiónis interrúptae damnatiónem confirmávit. Póntifex ínsuper vota fecit ut temporária páctio de Episcopórum nominatióne cum Sinis cito renovarétur. Francíscus suam étiam voluntátem osténdit próximis ménsibus Rússiam et Ucraínam peténdi et item nuntiávit duas féminas in Dicastério pro Epíscopis se nominatúrum.

(NOTÍTIAE BREVÍSSIMAE)

Per núntium telegráphicum Francíscus Papa suum maerórem patefécit ob cardinális Brasiliénsis Cláudii Hummes mortem, quem prope se volut vespertíno témpore eléctum Pontíficem. Complúres memorávit annos “actuósi servítii Ecclésiae, quod ipse ex evangélicis praecéptis usque egit”. Franciscális purpurátus, Archiepíscopus eméritus Sancti Páuli in Brasília ac Praeféctus eméritus Congregatiónis pro Cléricis, die quarto mensis Iúlii, octogínta septem annos natus, de hoc mundo migrávit. 

Haec háctenus. Próxima hebdómada, Deo iuvánte, redíbimus.