Hebdomada Papae, o boletim em latim do Vatican News

  “HEBDOMADA PAPAE”
   Notitiae Vaticanae Latine redditae
                         diei vicesimi tertii mensisi IuLii anno bismillesimo vicesimo secundo

(TITOLI)
Pontíficis núntius de Die Creáti: rebus gestis est respondéndum terrae “amáro clamóri”.
In Angélica Salutatióne Francíscus cohortátur ad Evangélium sine properatióne legéndum. Rursus de pace conciliánda in Ucráina.
Iter in Cánadam: iter erit paenitentiále

Salútem plúrimam ómnibus vobis auscultántibus núntios latína língua prolátos dicit Catharína Agorelius.

(SERVIZI)
Per núntium pro Die mundiáli precatiónis ad Creátum curándum, próximo die primo Septémbris celebrándo, Póntifex monet, ut creáti vox exaudiátur. Refert Alexánder De Carolis:

Terra Mater clamat, animántes clamant, páuperes, indígenae nostríque fílii futúrum intuéntes. Singulórum societatísque oecológica conversióne opus est: qui potest, eam perfíciat. Hoc scribit Francíscus in núntio pro Die mundiáli precatiónis ad Creátum Curándum, qui die primo mensis Septémbris celebrábitur. Arguméntum et adhortátio húius anni sunt Creáti vocem exáudi – instat Póntifex – et erit tempus oecuménicum, quod hoc die íncipit et éxplicit die quarto mensis Octóbris, festo sancti Francísci. Hoc Creáti témpore – monet Póntifex – orémus, ut qui Conferéntiis Unitárum Natiónum COP vigínti septem de caeli mutatiónibus et COP quíndecim de biodiversitáte praesunt humánam famíliam coniúngere váleant et caeli status discrímini ac biodiversitáti imminútae operóse subveníre.

In Salutatióne Angélica die décimo séptimo mensis Iúlii disséruit Póntifex de doméstica scaénula Marthae et Mariae in Evangélio huius diéi domínicae propósita. Fidéles exhortátus est, ut vitam dirígerent «ad normam a Iesu demonstrátam». Post precatiónem mónuit Póntifex, ut Natiónum commúnitas darent óperam bello in Ucráina exstinguéndo. Lóquitur Monia Parente:

"Iesus plúries cogitatiónes nostras evértit". In Angélica Salutatióne die décimo séptimo mensis Iúlii praetériti hábita, Póntifex quae supra dicta sunt cum Evangélii narratióne coniúnxit, in quo soróres duae Martha et María exhibéntur. Iesus Marthae, quae «satagébat circa frequens ministérium» (ex Evangélio Lucae in cápite decimo, versículo quadragésimo), dicit Maríam, ipsum audiéntem, óptimam partem elegísse (sicut légitur in eódem capitulo Lucae, ad versiculum quadragésimum primum). Francíscus explicávit «usum et offícium» opus esse semper «a Iesu verbo audíto manáre». Quaprópter fidéles cohortátus est, ut feriárum témpore frueréntur «ad aperiéndum Evangélium idque solúte legéndum». Post Salutatiónem Angélicam dictam íterum iterúmque quaesívit Póntifex, ut pactiónes restitueréntur ad bello finem imponéndum et caédibus in Ucráina.

(NEWS)
Post explétam Salutatiónem Angélicam, significávit Póntifex próximum iter in Cánadam a die quarto et vicésimo ad tricésimum diem próximi mensis Iúlii perficiendum, scílicet «paenitentiále iter», véniae ab indígenis géntibus peténdae causa, quae «políticam assimilatiónis» passae sunt ex parte etiam institutórum religiosórum. «Spes nos tenet peregrinatiónem hanc ad reconciliatiónis sanationísque iam suscéptum iter áliquid esse collatúram »: sic Póntifex.

A die primo próximi mensis Septémbris nova unitátis rátio Sanctae Sedis et Civitátis Vaticánae de pecúnia collocánda iníbitur. Pecúnia collocáta consentáneum provéntum effícere debet, ut Sanctae Sedis ópera sustineántur per incépta occupátae pecúniae, quae cum cathólicae Ecclésiae doctrína cóngruant.
Haec háctenus. Próxima hebdómada vobíscum.