O boletim de notícias em latim do Vatican News

                                                              “HEBDÓMADA PAPAE”
                                                   Notítiae Vaticánae Latíne rédditae
                        Die vicésimo séptimo mensis Augústi anno bismillésimo vicésimo secúndo

(TÍTULI)

Sex transáctis ménsibus a bello in Ucraína confláto in Audiéntia Generáli vox audítur Pontíficis: stultítia est in innocéntium detriméntum.
Pontíficis dolor de Nicarágua: diálogus fundaméntum sit observántis convíctus.
Cunctum mobiliáre patrimónium Sanctae Sedis a IOR ministrétur. Hoc per breve rescríptum státuit Póntifex.

Salútem plúrimam ómnibus vobis auscultántibus dicit Alexánder De Carolis et bene felicitérque sit vobis audiéntibus núntios Latína lingua prolátos.

(NOTÍTIAE PRAECÍPUAE)

Améntia est in innocéntium damnum. Novíssimae Audiéntiae Generális témpore Francíscus Papa bellum in Ucraína íterum damnávit, quod sex abhinc menses concitátum est, “certos actus” póstulans ad pacem adipiscéndam ac nucleárem calamitátem vitándam. Refert Rosárius Tronnolone:
“Ob óculos tanta atrócitas versátur, tot innocéntes, qui insanitátem patiúntur ómnium pártium, quóniam bellum est améntia”. Submíssa flagrantíque voce hoc iudícium dénuo manifestávit, quod álias patefécit. In Audiéntia Generáli die quarto et vicésimo mensis Augústi praetériti, quaedam gráviter dixit, cum sextus mensis memorabátur a bello in Ucraína confláto. “In corde captívos gérimus, in primis infirmióres atque ab officiósis potestátibus, pétimus ut dent óperam iis liberándis” – ait Póntifex – ácriter confírmans “eos, qui bello et armórum commércio lucrántur, esse scéleris artífices, humanitátem necántes”. Sub Audiéntiae finem, Póntifex est ab Ucrainórum parvulórum manípulo circumdátus, quos Itálica Cáritas hospítio recépit, quique suas figúras ei demonstrárunt.

Apud Angélicam Salutatiónem die vicésimo primo mensis Augústi, Francíscus quaedam dixit sollicitúdinem solidarietatémque osténdens pro Ecclésia in Nicarágua, iam diu ab illíus Natiónis potestátibus vexáta. Refert Mónia Parente.
Epíscopi intra suárum domórum paríetes concludúntur, presbýteri in cárcere detinéntur, complúra cathólica radiophónica emissória sunt cláusa. Séries haec est coartatiónum quae Ecclésiam in Nicarágua usque affíciunt. Quae acta sunt a regímine prǽsidis Daniélis Ortega, quia sustinére vidéntur oppositóres regíminis Sandinístae. Inter gravióra annumerándum quod praecáutum est – quod étiam inter Natiónes damnátur – ut Epíscopus Matagalpénsis, Rolándus Alvarez, intra domum manére cogerétur. In Angélica Precatióne die domínico praetérito suum dolórem suámque sollicitúdinem de hac condicióne patefécit Póntifex. Exoptámus, áddidit, ut “per planum sincerúmque diálogum” fundaméntum étiam reperíri possit observántis et pacatórii convíctus”.

(NOTÍTIAE BREVÍSSIMAE)

Mobiliáre patrimónium Sanctae Sedis a IOR ministrétur. Hoc per breve rescríptum decrévit Póntifex, in quo statúitur uníus Institúti Óperum Religiónis esse id ministráre atque Dicastéria, offícia et coniúncta institúta Sanctae Sedis ad illud ómnia pecuniária ac praeséntes nummos transférre debére.

Cum Epíscopis diálogum instítuit Póntifex de Ecclésiae ministériis. Per núntium, quinquagínta transáctis annis a motu próprio "Ministéria quaedam" Páuli sexti, utilitátem éxtollit Francíscus Papa experientiárum horum annorum communicandárum cum conferéntiis episcopálibus orbis terrárum. Ágitur – inquit – de itínere producéndo, nullo impellénte per ea “quae ad ideológica iudícia spectant”.

Háctenus de rebus gestis, de novis próxima hebdómada.