O boletim de notícias em latim do Vatican News

“HEBDÓMADA PAPAE”
                                                       Notítiae Vaticánae Latíne rédditae
                          Die tértio mensis Septémbris anno bismillésimo vicésimo secúndo

(TÍTULI)
Vigínti novi cardináles sábbato praetérito in octávo consistório sunt creáti a Francísco Papa. Idem Póntifex purpurátos est cohortátus ut mitem potentémque Christi flammam mundo deférrent.
Póntifex Áquilam die domínico vicésimo octávo invísit. Trédecim post annos quam illa loca terrae motus quassáverat, spei verba détulit, proláta in annum Caelestíni quinti Perdonántiae, quae dícitur.
Salútem plúrimam ómnibus vobis auscultántibus dicit Philíppus Herrera-Espaliat et felíciter vobis audiéntibus núntios Latína lingua prolátos.

(NOTÍTIAE PRAECÍPUAE)
Vigínti novi purpuráti, quorum sédecim electóres, in Cardinálium Collégium ex público Consistório, Sábbato die séptimo et vicésimo mensis Augústi a Summo Pontífice sunt reláti. Primum quattuor Natiónes ad hunc honórem admittúntur, scílicet Mongólia, Paraguáia, Singapúra et Timória Orientális. Audiámus Mónia Parente:
In Papáli Basílica Sancti Petri, fidélibus repléta, vigínti novos cardináles creávit Francíscus Papa, qui Ecclésiae moderándae opem ferrent. Unicúique birétum, piléolum, ánulum ac bullam, presbyterálem Títulum aut diaconíam deferéntem, trádidit. Eos álloquens et ad omnes purpurátos, homíliam enuntiávit ex ignis imágine pénitus prodiéntem. Eis ánimum áddidit ut húmilem magnanimitátem, mitem poténtiam et universalitátem ad mínima inténtam exercérent. Ex iis animósam curam quaesívit “magnárum aeque ac parvárum rerum”. Áltera Consistórii pars ad suffrágia est dicáta canonizatiónis beatórum Ioánnis Baptístae Scalabrini et Artémidis, die nono mensis Octóbris anno bismillésimo vicésimo secúndo eventúrae.

Fervens archidioecésis Aquilánae visitátio fuit, quae die domínico praetérito óptigit. Póntifex Iubilǽum Caelestíni quinti primum post plus septem sǽcula apéruit. Refert Rosárius Tronnolone:
Mane die domínico vicésimo octávo mensis Augústi Francíscus Papa helicóptero Áquilam se cóntulit, apostólicum fáciens iter. In plátea Cathedrális templi Aquilános convénit, inter quos complúres fuérunt familiáres illórum qui anno bismillésimo nono ob terrae motum interiérunt. Eis grátias egit Póntifex propter fídei testificatiónes datas illósque laudávit eo quod a calamitáte resiluíssent; ipsos item est hortátus ut próximi essent illis qui advérsa patiúntur. Proínde Summus Póntifex Sanctam Missam celebrávit ante Basílicam Collismádii et Angélicam salutatiónem recitávit. Contínuo post Portam Sanctam Basílicae apéruit, Perdonántiam, ut áiunt, Caelestíni quinti incípiens, scílicet iubiláre indulgéntiae tempus, postrémum abhinc septingéntos vigínti octo annos a Caelestíno quinto convocátae ac totum per annum prodúctae.

(NOTÍTIAE BREVÍSSIMAE)
Audiéntiae Generális témpore die tricésimo primo mensis Augústi, Francíscus Papa novam catechésis sériem incépit, cuius arguméntum est discrétio christiána. Ad Pontíficis mentem discrétio intellegéntiae est exercítium quae cognitiónem, experiéntiam, afféctus ac voluntátem compléctitur. Áttamen ut bona discrétio habeátur, opórtet filiálem necessitúdinem cum Deo pérsequi, qui nostram libertátem semper obsérvat, quia, ad Pontíficis mentem, “amórem in libertáte tantum experíri póssumus”.

Haec háctenus. Próxima hebdómada rursus accedémus ad vos.