Hebdomada papae, o boletim em latim do Vatican News

“HEBDÓMADA PAPAE”

Notítiae Vaticánae Latíne rédditae

Die octavo mensis Octobris anno bismillésimo vicésimo secúndo

(TÍTULI)

In Audiéntia Generáli suádet Póntifex: seípsos cognóscere opórtet ad diáboli mendácia arcénda. Idem adhortátur: pax in sauciáta Ucráina conciliétur. Deus corda immutáre valet.

In Salutatióne Angélica Francíscus: Putin bellum compónat, Zelensky paci sério propósitae se pandat.

De caeli statu: Cívitas Vaticána natiónum Unitárum ac Lutétiae Parisiórum pactiónes récipit.

Felícem exóptat diem Catharína Agorelius ómnibus haec verba, língua Latína proláta, audiéntibus.

(NOTÍTIAE PRAECÍPUAE)

In Audiéntia Generáli diéi quinti mensis Octóbris, Francíscus Papa catechésium sériem de discretióne perréxit ac sub finem dénuo obtestátus est, ut in Ucráina ad pacem tandem pervenirétur. Lóquitur Olga Sakun.

In quarta catechési de discretióne, in Audiéntia Generáli die quinto mensis Octóbris hábita, Francíscus adhortátus est ad ánimae medúllas intímius perspiciéndas, ut «nos ipsos cognoscámus», vidélicet id quod gaudére, id quod pati, id quod decédere nos facit. Póntifex monet diábolum probe novísse «verba secréta nostra tuéntia» tangeréque sensibília nostra ac prolectáre nos «per illécebram» cursus honórum, títuli studiórum, necessitúdinum. Deus dein adest, qui unus dignitátem nostram «confirmáre»  valet: «pro nobis mórtuus est, demónstrans quam pretiósos nos esse coram óculis suis». Sub Audiéntiae finem rursus hortátus est ad precándum pro excruciáta Ucráina, pacis donum quærens a Dómino, «qui corda immutáre potest».

Francíscus, qui de atómicis minis deque augescénti bello in Ucráina sollicitátur, totam Salutatiónem Angélicam diéi secúndi mensis Octóbris ad indútias in Ucráina requiréndas útique addíxit. Lóquitur Alexánder De Carolis.

«In nómine Dei et humanitátis sensus, qui omne cor íncolit, renovámus adhortatiónem ad arma statim deponénda»: bellum in Ucráina mundum univérsum minátur et Francíscus Papa, qui de mortuórum augménto et atómico perículo sollicitátur, tempus, plerúmque ad Evangélium diéi explicándum destinátum, belli arguménto dicávit. Póntifex ipsum Vladimírum Putin, Russiae prǽsidem, adhortátus est, ut sériem violéntiae ac mortis ad finem addúceret, et Ucráinae prǽsidem Volodimírum Zelensky, ut «sériis propósitis pacis» pánderet se. Novíssima quoque acta coárguit Francíscus, scílicet quáttuor Ucráinae orientális regiónum – Donetsk, Luhansk, Zaporizhzhia et Kherson - Russiae adiectiónem, quae partim retinéntur post diéi vicésimi quarti mensis Februárii incúrsum. Quaesívit Póntifex, ut libertátis ius et soli intégritas cuiúsque Natiónis, aeque ac minórum pártium iura servaréntur.

(NOTÍTIAE BREVÍSSIMAE)

Die festo Sancti Francísci Assisiénsis, quarto mensis Octóbris, qui, praeter nomen, stúdium commúnis Domus coléndae Pontífici iniécit, Cardinális Secretárius Status Petrus Parolin enuntiávit Sanctam Sedem, nómine ac loco Status Civitátis Vaticánae, adhaesísse Conventióni Natiónum Unitárum de caeli status mutatiónibus et Lutétiae Parisiórum Pactióni.

Satis dictum est. Nova, próxima hebdómada.