Hebdomada Papae, o boletim em latim do Vatican News

“HEBDÓMADA PAPAE”

Notítiae Vaticánae Latíne rédditae

Die décimo mensis Decémbris anno bismillésimo vicésimo secúndo

(TÍTULI)

Per signa nobis Deus monet quae iusta eligénda sunt. Quod in undécima spiritális discretiónis catechési ásserit Francíscus Papa.

Duóbus pestiléntiae exáctis annis, Immaculátae Conceptiónis signum apud Pláteam Hispánicam in Urbe venerátur Póntifex.

In priváta audiéntia Summus Póntifex Robértum Benigni, Ítalum praeclárum actórem, recépit.

Salútem plúrimam ómnibus vobis auscultántibus núntios Latína lingua prolátos dicit Philíppus Herrera-Espaliat.

(NOTÍTIAE PRAECÍPUAE)

Séries de discretióne spiritáli Catechésium Francísci Papae continuátur. Audiéntiae Generális témpore praetérita féria quarta de illis interióribus signis est locútus Summus Póntifex quae Deus nobis tríbuit percontántibus iusta eligénda necne. Audiámus Rosárium Tronnolone.

In praetéritis catechésibus postquam ponderávit ante Dóminum quae essent eligénda, Sanctus Pater osténdit quómodo proba discrétio ad intellegéndum iuváre posset, an ǽquam sémitam ingréssi essémus. Francíscus explicávit tanti esse vígiles manére, post deliberatiónem quoque suscéptam ad signa percipiénda quae eam confírment. His ex signis sensus intérior pacis ac memor ánimus coram Deo reperiúntur. Áliud magni moménti est cum quis ǽquum locum in vita invéniat, cumque animadvértat maióris consíliis se esse partícipem. Finem fáciens Póntifex asséruit áliud bonum signum esse quod líberi manerémus prae rebus deliberátis, ánimo suspénso, paráti ad id considerándum, quandóquidem Deus unus scit quid pro nobis sit bonum.

In sollemnitáte Immaculátae Conceptiónis, Francíscus Papa cum fidélibus in Vaticáno Angélicam Salutatiónem recitávit. Post merídiem ad papálem Basílicam Sanctae Maríae Maióris se cóntulit atque deínde, ut mos est, ad Hispánicam Pláteam, Beátae Maríae Vírginis signum veneratúrus. Réttulit Márius Galgano.

Complúra patrávit Summus Póntifex sollemnitátis Immaculátae Conceptiónis témpore féria quinta, die octávo mensis Decémbris. In Petriáno Foro cum Angélicam Salutatiónem díceret, patefécit Vírginem Maríam, peccátis originális expértem, nos monére, quamvis omnes essémus peccatóres, per Baptísmum primigéniam grátiam recepísse nostra in vita Spíritum Sanctum suscipiéndi nosque amátos Dei fíeri fílios. Círciter horam quintam décimam Francíscus ad papálem Basílicam Sanctae Maríae Maióris se cóntulit, ut coram imágine Vírginis, quae est Salus Pópuli Románi, privátim oráret. Póstea Hispánicam Pláteam petívit. Ibi, frequéntibus adstántibus fidélibus, in signum Vírginis Maríae supra colúmnam florum corónam imponéndam curávit et commúniter orávit. Id primum públice fecit Francíscus ad translatíciam consuetúdinem post pestiléntiam finítam.

(NOTÍTIAE BREVÍSSIMAE)

Fratérnus fuit occúrsus inter Francíscum Papam et Robértum Benigni, Ítalum actórem. Ante Audiéntiam Generálem eum domum Sanctae Marthae féria quarta Póntifex recépit. Post collóquium, subrisiónes salésque replétum, dona ii permutavérunt seque máxima cum ánimi affectióne salutavérunt. Benigni anno millésimo nongentésimo nonagésimo nono prǽmium Oscar est consecútus, ut clárior actor ex pellícula cinematográphica, cuius títulus “Vita est pulchra”, itálico sermóne “la vita è bella”.

Satis de núntiis díximus. Próxima hebdómada, Deo suffragánte, dénuo adérimus.