Hebdomada Papae, o boletim em latim do Vatican News

“HEBDÓMADA PAPAE”

Notítiae Vaticánae Latíne rédditae
                    Die vicésimo primo mensis Ianuárii anno bismillésimo vicésimo tértio

(TÍTULI)

Audiéntiam agens Generálem pro iis orat Póntifex qui in República Democrática Congénsi sunt interémpti et in Ucraína et dicit: “Deum desidério illórum tenéri qui ab Eo discédunt”.
Rursus in Angélica Salutatióne Francíscus: Ioánnes Baptísta nos docet ut ab officiórum honorúmque “cupiditátibus nos abducámus”.
Póntifex die tricésimo mensis Septémbris oecuménicam vigíliam constítuit “ut Deo sýnodi ópera dicántur”.

Salútem plúrimam ómnibus vobis auscultántibus dicit Catharína Agorélius quibus núntii Latíni perferúntur.

(NOTÍTIAE PRAECÍPUAE)

Audiéntiae Generális agens catechésim, praetérito die duodevicésimo mensis Ianuárii, Francíscus Papa fidéles est cohortátus ut Dóminum imitaréntur ad éius amórem testificándum. Sub finem Audiéntiae, Rempúblicam Democráticam Congénsem itémque Ucraínam memorávit. Refert Alexánder De Carolis.
In secúndo occúrsu seríei catechésium, qui stúdio dicátur evangelizatiónis et apostólici óperis, de Iesu cogitávit Póntifex, sicut nuntiatiónis exémplo. Ut nostram pastorálem navitátem perpendámus, éxtulit Francíscus Papa, nos percontári debémus an patiámur ac pro próximo perículum adeámus “congruénter cum Iesu corde, hoc cum pastoráli corde”. Audiéntiae finem impónens, damnávit Póntifex aedes ictas in urbe Dnipro Ucraínae, ex quo plus quadragínta hómines interiérunt: “Indifferéntes manére non póssumus”, dixit, orans ínsuper étiam pro República Democrática Congénsi, ubi nuper crímina sunt patráta, quamque sub ménsis finem invíset: “Quot christiáni súomet in córpore vim patiúntur: orémus pro eis!”.

In Angélica Precatióne die quinto décimo mensis Ianuárii, Francíscus autumávit christiános ad ánimum servítii habéndum vocári, qui honóres non requírunt, ómnes hortans ad virtútem coléndam, sicut Ioánnes Baptísta, “recédere discéndi”. Lóquitur Mónia Parente.
Servítii ánimus, humílitas et oboediéntia, quae sanctum Ioánnem Baptístam direxérunt, Iesu Baptísmo ablúto, Francísci Papae cogitatiónis príncipem obtinuérunt locum in novíssima Angélica Precatióne. Póntifex áddidit quod Ioánnes “missus erat ad Méssiae viam parándam idque fécerat nihil sibi parcens”, atque ad hóminum ratiónem cogitári potest eum “prǽmio” esse honestándum. At contra Francíscus osténdit Baptístam, offício perácto, “se subdúcere, de scaena decédere velle ut Iesu locum prǽbeat”. Ídeo simplicitátem est testátus: “Pópulo praedicávit, discípulos quosdam recépit, quos pérdiu instítuit. Sed néminem sibi sociávit”.

(NOTÍTIAE BREVÍSSIMAE)

Angélicae Salutatiónis sub finem, die quinto décimo mensis Ianuárii, Póntifex oratiónis oecuménicam vigíliam praestítuit ut Deo committeréntur ópera sextae décimae Sessiónis Generális Ordináriae Sýnodi Episcopórum, cuius arguméntum est Synodálitas, consequénti mense Octóbri agéndae. Vigília die tricésimo mensis Septémbris anno bismillésimo vicésimo tértio, in Foro Petriáno, celebrábitur.
Die praetérito duodevicésimo mensis Ianuárii “Hebdómada Precatiónis pro Unitáte christianórum” celebrári coepta est, cuius arguméntum ex prophétae Isaíae Libro est deprómptum: “Díscite bonum fácere, quǽrite iustítiam", orándum et operándum ut inter omnes in Christum credéntes, magis ac magis ad plenam communiónem iter inveniátur.

Satis est dictum, nova eventúra, próxima hebdómada