Hebdomada Papae, o boletim em latim do Vatican News

“HEBDÓMADA PAPAE”

NOTÍTIAE VATICÁNAE LATÍNE RÉDDITAE

Die duodevicésimo mensis Februárii anno bismillésimo vicésimo tértio

TÍTULI

In Audiéntia Generáli Póntifex ait: nuntiémus una simul Deum prope esse. Rursus de pace conciliánda in Ucraína.

In Angélica Salutatióne Francíscus assevérat amórem mandátis tribúere significatiónem. Ínsuper ne oblivióne deleántur qui in Sýria ac Turcárum República terrae motum passi sunt.

Ex Dicastério pro Íntegra Humána Progressióne fovénda breviárium de terrárum orbe servándo.

Salútem plúrimam ómnibus vobis auscultántibus núntios Latína lingua prolátos dicit Catharína Agorelius.

NOTÍTIA 1

In Audiéntia Generáli die praetérito quinto décimo mensis Februárii, íterum stúdio praedicándi dicáto, vestigávit Francíscus “missionálem sermónem”, ut áiunt, Iesu ad discípulos. Post catechésim, rursus ad pacem obtinéndam in Ucraína est cohortátus. Refert Rosárius Tronnolone.

Evangélii nuntiándi cardo sibi vult “ut mites boníque sicut agni, absque mundi spécie, una procedámus”, dicéntes “Deum prope esse” nosque dilígere, quóniam, eo quod laetánter nos Dei fílii sumus, id cum frátribus sororibúsque communicári debet, hoc nondum nesciéntibus”. Pontíficis catechésis in Audiéntia Generáli die praetérito Mercúrii ipsum est caput, quae quarta stúdio evangelizándi dicátur. Quod stúdium, áddidit Francíscus Papa, “ómnia, mentem, cor, manus” complécti debet. Post finítam catechésim, íterum Natiónum communitátem hortátus est Póntifex ut arma in Ucraína silérent, a bello suscépto fere anno transácto, in quo innúmeri hómines interiérunt.

NOTÍTIA 2

In Salutatióne Angélica die praetérito domínico planum fecit Póntifex normis opus esse, sed ultra lítteras est vivéndum. Íterum adhortátio ne oblivióne tegeréntur qui in Sýria ac Turcárum República exitiósum terrae motum passi sunt. Refert Olga Sakun.

Lex ac Prophétae ad efféctum plane adducántur: hanc ob ratiónem venísse Iesus osténdit in Evangélio quod in domínici diéi duodécimi mensis Februárii litúrgia príncipem óbtinet locum. Suis ex verbis in Angélica Salutatióne palam osténdit Póntifex normis opus esse, sed ut hae compleréntur lítteras praetérgredi opórtet”. Cum quis se rectum iúdicat, adiécit Póntifex, eo quod vitam alícui non adémit, non furátus est aut malum non fecit, ei tantum est “extrária relígio et incuriósa”, hoc sibi vult ut “mínimo necessário conténti simus, dum ad quam máximum nos cóncitat Iesus et extra modum ad amándum, sicut fecit Ipse”. Salutatióne Angélica ad finem addúcta, cum adstántes alloquerétur, est cohortátus ne ex memória deponeréntur qui in Sýria ac Turcárum República terrae motum passi sunt, qui motus terrae die sexto mensis Februárii plus quadragínta unum mília hóminum necávit, et solidarietátem ínsuper erga Ucraínam iterávit Francíscus.

NOTÍTIAE BREVÍSSIMAE

Die quinto décimo mensis Februárii breviárium est demonstrátum, cuius títulus “Nostra commúnis domus: indícia ad nostrum vivéntem terrárum orbem coléndum”, quod Institútum Ámbitus Holmiénse ac Dicastérium pro Íntegra Humána Progressióne fovénda édidit. Libéllus, collustrátus et figúris refértus, a Lítteris encýclicis Laudato si’ Francísci Papae procédit.

Haec dicénda putávimus, nova audiétis próxima hebdómada”.