Hebdomada Papae, o boletim em latim do Vatican News

“HEBDÓMADA PAPAE”

NOTÍTIAE VATICÁNAE LATÍNE RÉDDITAE

Die vicésimo quinto mensis Februárii anno bismillésimo vicésimo tértio

TÍTULI

Rursus veheménter ad pacem cohortátur Francíscus Papa, anno exácto a bello in Ucraína iníto. Necessitátem confirmávit idem pacífice contentiónis solvéndae.

Quadragésima incoáta, Francíscus fidéles suásit ut hoc acceptábili témpore frueréntur ad praecípua repeténda, in grátiam cum Deo reditúri. Quod fácere nos debémus – mónuit Póntifex – absque simulatióne.

Per rescríptum duas res Litterárum Apostolicárum motu proprio datárum Traditiónis custódes plane definívit Summus Póntifex, quibus ab anno bismillésimo vicésimo primo litúrgicae celebratiónes praeconciliáris ritus temperántur.

Salútem plúrimam ómnibus vobis auscultántibus núntios Latína lingua prolátos dicit Philíppus Herrera-Espaliat.

NOTÍTIAE PRAECIPUAE

Duos ante dies ex quo annus recensétur ab Ucraína a Russis obséssa, ex potestátibus quaesívit Póntifex ut bello restinguéndo óperam re darent. Quod in Audiéntia Generáli die praetérito Mercúrii dixit, suam quoque sauciáto Ucraínae pópulo osténdens proximitátem. Audiámus Rosárium Tronnolone.

“Satis tandem de bello!, quae ex pariétinis óritur numquam vera erit victória”. Verbis his Audiéntiae Generális post catechésim die Mercúrii Cínerum enuntiátis, omnes víctimas memorávit Francíscus armátae contentiónis abhinc annum exórtae, post Ucraínam a Russis obséssam. Íterum hanc béllicam rem absúrdam perniciosámque definívit Póntifex. Tot mórtuos, sauciátos, prófugos ob óculos habens, potestátes mónuit Póntifex ut re óperam darent ad bellum sisténdum adque pacem componéndam.

Tribus post annis quam públice missae die Mercúrii Cínerum non praesédit Francíscus, die vicésimo áltero mensis Februárii rédiit Francíscus Papa in Basílicam Sanctae Sabínae sacram litúrgiam celebratúrus, qua Quadragésima inchoátur quadragínta diérum paenitentiálium. Audiámus Catharínam Agorelius.

Complúres fidéles, cardináles, epíscopi, mónachi Benedictíni ac Dominicáni patres una cum Pontífice in Basílicam Sanctae Sabínae sunt congregáti per eucharísticam celebratiónem Quadragésimae litúrgicum tempus incohatúri. In Pontíficis cápite cíneres pósuit cardinális Máurus Piacenza. Sua in homília Francíscus explicávit hoc esse acceptábile tempus ut caverémus ne mundus in artos fines nostrárum ipsárum necessitátum concluderétur, sed tempus esse grátiae tribus magnis sémitis exigéndum, nempe eleemósynae, precatiónis et ieiúnii. Omnes hae res, áddidit Francíscus, ad Dómini Pascham parándam multum cónferunt, atque item dant cópiam Dei conveniéndi et persónam détrahunt opiniónum vanitátis ac simulatiónis.

NOTÍTIAE BREVÍSSIMAE

Per rescríptum duas res Litterárum Apostolicárum motu proprio datárum Traditiónis custódes fúnditus definívit Summus Póntifex, quibus mense Iúnio anni bismillésimi vicésimi primi praecépta prǽbuit de litúrgica celebratióne praeconciliáris ritus. Novum documéntum a Pontífice subsignátum confírmat tum paroeciális templi usum super istis litúrgiis, tum antíqui Missális usum ab epíscopo concédi posse, sed a Sancta Sede dumtáxat adépta licéntia.

Finis fit loquéndi. Grátias vobis audiéntibus reférimus atque, Deo volénte, conveniémus próxima hebdómada.