Hebdomada Papae, o boletim em latim do Vatican News

       HEBDÓMADA PAPAE”
                NOTÍTIAE VATICÁNAE LATÍNE RÉDDITAE
                 Die vicésimo primo mensis Octóbris anno bismillésimo vicésimo tértio

(TÍTULI)

De synodalitáte Sýnodi ópera producúntur: opus quidem “pulchrum”, “ánimum movens”, “magni moménti”.
Audiéntiae Generáli finem impónens Póntifex pro pace precátur: “Hóminum calámitas est vitánda”, qui páriter cohortátur ad quodam die ieiunándum.
Alimóniae mundiáli die Francíscus asséverat: “Aqua vitae progressúsque in ómnium benefícium est fons”.

Salútem plúrimam ómnibus vobis auscultántibus núntios Latínos dicit Eugénius Murrali.

NOTÍTIAE)

Ad finem Sýnodi ópera cum sint perventúra, generális relátor, cardinális Ioánnes Cláudius Hollerich hortátur ut studióse procedátur. Refert Mónia Parente.
“Probe scimus hanc Sýnodum ex cuiúsdam moménti mutatiónibus eventúris ponderátum iri”. Quod cardinális Hollerich autumávit, íncohans duodécimam Sýnodi generálem Sessiónem, quartae parti dicátam instruménti labóris vidélicet de auctoritáte, de servítio, de discretióne, de dispertítis offíciis. Ex tractátis arguméntis “clericalísmus” exstat, qui mos intérdum ad láicos quoque áttinet, isque ímpedit quóminus Ecclésia procédat. Praecípuum quoque óbtinet locum disputatiónum “discrétio in commúne” atque “probábilis discrétio”. Tanti est - planum fecit cardinális - favére “traditiónis increménti alácribus víribus: quod erráta discrétio frángere aut sístere potest. In utróque casu interíbit”. Die Iovis vésperi synodáles patres áliquid témporis precatióni dicárunt, ad Pontíficis voluntátem, ut migrántes et pérfugae commemoraréntur.

Post catechésim de Cárolo de Foucauld, apostólici stúdii lenitudinísque teste, Póntifex Audiéntiam Generálem ad finem addúxit, ánxium ad Terrae Sanctae condiciónem réferens ánimum. Refert Alexánder De Carolis.
“Víctimae increbréscunt et Gazae condício est desperánda, ómnia, quǽsumus, suscipiántur ut humanitátis calámitas prohibeátur”. Hisce verbis Francíscus suam sollicitúdinem osténdit de bello inter Ísrael et Palaestínam incoháto. Credéntes est hortátus Póntifex ut pacis partes ágerent: “Síleant arma, clamor audiátur pacis páuperum, pópuli, parvulórum. Nihil solvit bellum, mortem solúmmodo et vastatiónem affert. Ódium áuget, ultiónem multíplicat. Bellum delet futúrum”. Fidéles ínsuper suásit Póntifex ut diem, scílicet séptimum et vicésimum mensis Octóbris, exígerent, precántes, ieiunántes ac paeniténtiam agéntes. Adhortátio quoque ad Ucraínae calamitátes est convérsa, ubi bellum profértur, quamvis de eo sileátur.

(NOTÍTIAE BREVÍSSIMAE)

Die mundiáli alimóniae occurrénte, núntium misit Póntifex generáli moderatóri Fao, ut áiunt, Qu Dongyu, quo postulávit ut ómnibus aquae accéssus praestarétur, quae numquam putánda est merx vel res permutánda. De hoc arguménto stúdii seminárium actum est apud studiórum Universitátem Sanctae Crucis.

Collóquium percontatívum societátis editóriae, quae est Télam, cum Pontífice est actum: “Lucrum pravum una est ex cáusis exoriéntis belli. Áltera orígo ad geopolíticum genus spectat, quod est territórii domínium”. De áliis quoque arguméntis est disceptátum ut de discrímine falsísque messíis, de ópere, de intellegéntia artificiáli, de sýnodo ac spe.

Diplomáticis Legatiónibus, Sanctae Sedi relátis, Adhortatiónem apostólicam Laudáte Deum est exhíbita. Dénuo cuiúsque repétitur urgens offícium geréndum ad commúnem domum tutándam.

Satis de actárum rerum narratióne, nova, próxima hebdómada.