Hebdomada Papae, o boletim do Vatican News em latim

HEBDÓMADA PAPÆ

NOTÍTIÆ VATICÁNÆ LATÍNE RÉDDITÆ

Die sexto mensis Iúlii anno bismillésimo vicésimo quarto

TÍTULI

In sollemnitáte Sanctórum Petri et Páuli Póntifex ait: “Ecclésia ac socíetas sunt aedificándae, iánuis paténtibus”.
In Angélica Salutatióne die praetérita domínica Francíscus ásserit: “Non pudet Deum nostri, nos non iúdicat”.
De precatióne mense Iúlio dicénda et apud mundiále rete diffúsa sic enuntiátur: “Pastorális ópera infirmórum”.
Salútem plúrimam ómnibus vobis auscultántibus núntios Latínos dicit Eugénius Murrali.

NOTÍTIAE

Sollémnis Missa celebrátur aeque ac Salutátio Angélica recitátur, festivitáte interveniénte sanctórum Petri et Páuli, Romae patronórum, qui praeclárum evangelizatiónis praebuérunt exémplum. Refert Mónia Parente.

“Duos apóstolos respiciámus Petrum et Paulum, Galilǽae piscatórem, quem Iesus hóminum piscatórem réddidit; et pharisǽum Ecclésiae persecutórem, qui per Grátiam géntium evangelizátor est factus”. Sic Pontíficis íncipit homília in Sollemnitáte sanctórum apostolórum Petri et Páuli, in basílica papáli Sancti Petri celebráta. Ínibi quadragínta duóbus archiepíscopis metropólitis, infra postrémum annum nominátis, Póntifex pállium trádidit, quos hortátus est Francíscus, ut “sollíciti essent pastóres, qui […] óperam darent Ecclésiae aedificándae ac societáti, paténtibus iánuis”. Missam est consecúta Angélica Salutátio in Petriáno Foro, ubi sensum explicávit Francíscus Papa clávium Regni, Petro demandatárum: “Auctóritas est servítium, quae si non servit in dictatúram evádit”, quóniam apóstoli missio est “cunctos adiuváre ut ingrediéndi viam repériant”. Post Angélicam Salutátionem Romános salutávit Papa eísque pro magna florum exornatióne grátias egit.

In Angélica Salutátione die domínica evangélicam narratiónem collustrávit Francíscus de haemorrhoíssa sanáta et Iáiri fília a mórtuis excitáta. Refert Alexánder de Carolis.

“Ecclésia opus est ac societáte, quae néminem seiúngant, quae néminem “impúrum” arbitréntur, ut unusquísque sua cum história, recipiátur et amétur sine notis nec praeiudíciis, ómnibus detráctis adiectívis, amétur”. Férvidis his verbis Francíscus Papa Evangélium collustrávit secúndum Marcum (Mc 5,21-43) atque est argumentátus per utrámque sanatiónem, per tactum factam, sensum quo quis et tangit et tángitur, Deum éxprimens hóminum dolórem attingéntem sine personárum acceptióne. Post Angélicam Salutatiónem íterum est locútus Póntifex de pace conciliánda in Ucraína, Palaestína et Myanmár ceterísque passiónis locis: “Sacrum Iesu Cor implorémus ut illórum móveat corda qui bellum cúpiunt, et ipsi ad diálogi pacísque propósita convertántur”.

NOTÍTIÆ BREVÍSSIMÆ

 “Infirmórum Únctio et ‘sanatiónis, curatiónis sacraméntum’, quod spíritum sanat” atque non modo “pro moritúris”. Id enodávit Francíscus per núntium televisíficum quem mundiále Rete precatiónis Pontíficis mense Iúlio evulgávit.

Die áltero mensis Iúlii quosdam migrántes recépit Papa, comitátos inter céteros, a reveréndo Matthía Ferrari. Primas partes egérunt duo iúvenes, scílicet Abrámus Lo ex Senegáli oriúndus, qui per Líbyam tránsiit, et Ebrima Kuyateh, ex Gámbia oriúndus, qui libros de suis tristis vícibus edidérunt.

Legatiónem recípiens Patriarchátus Oecuménici Constantinopolitáni, in festivitáte sanctórum Petri et Páuli, Primi Concílii Oecuménici anniversárium memorávit Póntifex, próximo anno recenséndum, atque Bartholomǽo grátias réttulit de invitatióne eiúsdem una celebrándi in locis, ubi actum est.

Nihil opus est plura; eventúra, próxima hebdómada.