Hebdomada Papae, o boletim do Vatican News em latim

“Hebdómada Papae”

Notítiae Vaticánae Latíne rédditae

Die vicésimo mensis Iúlii anno bismillésimo vicésimo quarto

Títuli

In Angélica Salutatióne hortátus est Póntifex ut vitae módice agéndae rátio adhibeátur “ad libertátem fruéndam”. Íterum de pace conciliánda ubi inter gentes bello ómnia conflagáre conscipiúntur.
Pontíficis núntius: coram hodiérnis vícibus, necésse prorsus est paci obtinéndae óperam dare.
Iuvénibus Américae Latínae ait Póntifex: “Ne vereámini Deum in vestram vitam introférre”.
Salútem plúrimam ómnibus vobis audiéntibus núntios Latínos dicit  Catharína Agorélius.

Notítia 1

Ab unis solis non nuntiátur Evangélium atque necessário opórtet conténti simus, quia facílius sic una procéditur. In his duóbus rebus Francísci nítitur catechésis in Angélica Salutatióne. Refert Alexánder De Cárolis.

Commúnio ac sobríetas duo sunt verba quae in Angélica Salutatióne praébuit Francíscus Papa die quarto décimo mensis Iúlii, Evangélii locum enódans illíus diéi, in quo narrátur Iesum “binos” misísse discípulos, eos hortántem “ut secum necessárium dumtáxat deférrent”. Cum quísque in eo nítitur quod póssidet, et cum amori praepónderent “cuiúsque cómmodum et invídia”, tristítia exstat – argumentátur Póntifex – dum contra concórdia ac sobríetas quaédam sunt probánda necessária Ecclésiae ut vere sit missionária”. Post Angélicam Salutatiónem dictam, intercessiónem Beátae Vírginis de Monte Carmélo invocávit Póntifex pro locis dimicatiónibus funestátis ac pro náutis, Domínica Maris cum recenserétur.

Notítia 2

Pontíficis núntius Rectóri destinátur Órdinis Clericórum Regulárium Matris Dei, cum mille quingénti anni cultus simulácri Románae Portus Securitátis commemorántur. Refert Rosarius Tronnolone.

Pax est deprecánda, opórtet “pacis aedificatóres fiámus”, “húius mundi scaena ob óculos hábita”, quod patri Antonio Piccolo per epístulam dixit Póntifex, Rectóri Generáli Órdinis Clericórum Regulárium Matris Dei, cum mille quingénti anni recenseréntur veneráti simulácri Sanctae Maríae in Pórticu – Románae Pórtus Securitátis, quae Aetérnam Urbem tuétur. Dei est matérnus vultus, scríbit Póntifex, qui ádmodum difficílibus Ecclésiae tempóribus propter políticas conspiratiónes intestináque bella se revelávit. Quocírca hortátur Summus Póntifex Congregatiónem Mariálem “ad máius usque missionárium stúdium persequéndum atque in spiritáli vita ad continuátum progréssum.

Notítiae brevíssimae

Per núntium quéndam, cum ex vicésimo primo Occúrsu conveníret Póntifex moderatóres nationáles iúvenum pastorális óperae Américae Latínae et Caraibicórum locórum, Francíscus Papa adulescéntes est cohortátus, sinéntes ut “óptimos sensus Chrístus in verum amórem commutáret”.

In audiéntia recépit Francíscus partícipes capitulórum generálium sex Órdinum et Institutórum religiosórum. Eos álloquens mónuit ipse in vita consecráta ambitiónem esse morbum atque opus esse ut “una legeréntur, patiénter quidem, res praeséntes”. Proínde exhortátus est ut pro vocatiónibus orarétur, atque institútio curarétur illórum qui ad totam vitam Deo tradéndam se cómparant.

Haec paucis verbis, cétera nova, próxima hebdómada.