Hebdomada Papae, o boletim em latim do Vatican News

“HEBDÓMADA PAPAE”

NOTÍTIAE VATICÁNAE LATÍNE RÉDDITAE

Die tricésimo mensis Novémbris anno bismillésimo vicésimo quarto

TÍTULI

Hortátur Póntifex ad preces fundéndas pro Ucraína, funésta erit hiems.

Póntifex cardinálem Ayuso mémorat qui fratérnae inter gentes necessitúdini instituéndae óperam dedit.

De Sýnodo Póntifex ait: postrémum Documéntum ut magistérium pontifícium est recipiéndum.

Salútem plúrimam ómnibus vobis auscultántibus núntios Latínos dicit Márius Galgano.

NOTÍTIA 1

Audiéntiae Generáli finem impónens, Francíscus suam convértit mentem ad “cruentátam” Natiónem in orientáli Európae parte sitam, quae difficília témpora experiétur ob vim eléctricam detráctam per Russórum ictus. Refert Olga Sakun.

Adolescéntes hortátur Póntifex, ab iis Collégii Sancti Michaélis des Batignolles Lutétiae Parisiórum sumens inítium, sibi próximis, ut pro aequálibus precéntur. Exínde pacem ínvocat in Médio Oriénte, ubi “hómines multum patiúntur” ac proínde in Sinénsem sermónem catechésim diéi Mercúrii convérti áutumat. Peregrínos Polónos quoque salútans, omnes fidéles suásit ut “misericórdes essent ac pacis artífices, male habéntes et ob bella patiéntes, nominátim Ucraínos, híemi óbviam itúros, sustinéntes. In Ucraína luctuósa erit hiems.

NOTÍTIA 2

 “In quálibet apostólica ópera testándi desidério, mitis ac prudens, Dei dilectióne pro homínibus ipse est permótus, studens ut inter gentes ac religiónes fratérna necessitúdo conciliarétur”. His quidem verbis Francíscus Papa cardinálem Michaélem Ángelum Ayuso Guixot, praeféctum Dicastérii pro Diálogo inter Religiónes recordátur, qui, septuagínta duos annos natus, die quinto et vicésimo mensis Novémbris de hoc mundo demigrávit. Lóquitur Rosárius Tronnolone.

Hispánicus Purpurátus in valetudinárium Románum Gemelli erat dedúctus atque “post diutúrnum morbum, quem sólida ex fide tulit”, óbiit. Quod in núntio telegráphico maeróris scribit Francíscus Papa eóque ad vicárium generálem Missionariórum Combonianiórum Cordis Iesu transmísso, in quorum institútum Cardinális Ayuso anno millésimo nongentésimo septuagésimo áltero est ingréssus. “Spiritális fílius sancti Daniélis Comboni”: scripsit porro Póntifex ut eum memoráret quem anno bismillésimo undevicésimo Dicastério praeposúerat, quod inter álias religiónes de necessitúdine agit, cardináli subeúntem Ioánni Ludovíco Tauran, qui in innúmeris apostólicis itinéribus ipsum sibi próximum vóluit.

NOTÍTIAE BREVÍSSIMAE

Postrémum Documéntum quintae décimae Generális Sessiónis Ordináriae Sýnodi Episcopórum, a Francísco Papa est comprobátum praetérito die vicésimo sexto mensis Octóbris idque “Magistérium ordinárium Petri Successóris partícipat et sicut id est postulámus ut recipiátur”. Póntifex, ex subnotatióne Documéntum comitánte, in Sollemnitáte Iesu Christi Universórum Regis subsignáta, confírmat, quemádmodum ex comprobatiónis cópia data dictum est, ipsum “non esse stricte praescriptívum” idque “applicándum váriis interpretatiónibus indigére”. Sed “istud haud secum fert ut Ecclésias non iúbeat ad quaedam eligénda, quae in eo indicántur”.

Francíscus per núntium quendam, a cardinále Petro Parolin, Secretário Status subsignátum, Conferéntiam Revisiónis Conventiónis salútat, quae globos ignívomos subterráneos advérsus hómines depéllere conátur, quaeque Cambógiae ágitur. Ipse omnes Civitátes cohortátur ut pactiónem ratam hábeant atque eláte ásserit Póntifex haec arma gravíssime hómines cruentáre, cum primis párvulos.

Finis fit loquéndi, potióra quaedam eventúra, próxima hebdómada.