Papa: tri vjet luftë në Ukrainë, “përvjetor i dhimbshëm dhe i turpshëm për njerëzimin”
R.SH. / Vatikan
Edhe një herë, lutja e Engjëllit të Zotit e së Dielës i krijoi Papës Françeskut mundësinë t’i falënderojë të gjithë ata që po tregojnë dashuri në këto ditë, duke e ndjekur gjatë mjekimit në Poliklinikën Gemelli, në Romë. Mendimet e tij, siç bëri edhe gjatë lutjes së Engjëllit të Zotit të dielën e kaluar, 16 shkurt, i kushtohen të gjithë punonjësve spitalorë, që kujdesen për shëndetin e tij.
Nga ana ime, vazhdoj me besim shtrimin në Poliklinikën Gemelli, duke vijuar mjekimet e nevojshme; edhe pushimi është gjithashtu pjesë e terapisë! Falënderoj sinqerisht mjekët dhe punonjësit e shëndetësisë të këtij spitali për vëmendjen që po më tregojnë dhe përkushtimin me të cilin kryejnë shërbimin e tyre ndërmjet njerëzve të sëmurë.
Ndër shprehjet e shumta të afërsisë, Françesku kujtoi veçanërisht ato të të vegjëlve.
Në këto ditë kam marrë shumë mesazhe dashurie dhe më kanë prekur veçanërisht letrat dhe vizatimet e fëmijëve. Faleminderit për këtë afërsi dhe për lutjet e ngushëllimit që mora nga e gjithë bota! Ia besoj të gjithë ndërmjetësimit të Marisë dhe ju kërkoj të luteni për mua.
Një nga vizatimet dërguar Papës nga fëmijët e Departamentit të Onkologjisë Pediatrike të Gemellit
Përshëndetje pjesëmarrësve në Jubileun e Diakonëve
Papa u drejtoi, pastaj, përshëndetjet e tij kandidatëve për diakonat dhe të gjithë pjesëmarrësve në Jubileun e Diakonëve, zhvilluar ditët e fundit në Vatikan, që morën pjesë edhe këtë mëngjes, në Bazilikën e Shën Pjetrit, në meshën e kryesuar, siç ishte deleguar nga Papa, nga Imzot Rino-Prefekti i cili lexoi homelinë e përgatitur nga Papa.
Papa u bën të gjithëve ftesën për të ndjekur rrugën e dashurisë në ushtrimin e apostullimit të tyre.
Të nderuar vëllezër Diakonë, ju që i kushtoheni shpalljes së Fjalës dhe shërbimit të bamirësisë; kryejeni shërbesën tuaj në Kishë me fjalë dhe me vepra, duke sjellë dashurinë e mëshirën e Zotit për të gjithë. Ju bëj thirrje të vazhdoni me gëzim apostullimin tuaj dhe - siç na porosit Ungjilli i sotëm nga Luka- të jeni shenjë e një dashurie që i përqafon të gjithë, që e shndërron të keqen në të mirë dhe krijon një botë vëllazërore. Mos kini frikë të rrezikoheni për dashurinë!
Ukrainë, përvjetor i turpshëm
Françesku, si zakonisht, i bëri thirrje besimtarëve të luten për paqe në të gjitha ato vende, që po përballojnë konflikte dramatike, nga Palestina në Sudan, me një mendim të veçantë për Ukrainën, e cila nesër, më 24 shkurt, do të përjetojë përvjetorin e tretë të fillimit të luftës: turp, denoncon, për mbarë botën.
Nesër mbushet viti i tretë i luftës në shkallë të gjerë kundër Ukrainës: përvjetor i dhimbshëm dhe i turpshëm për mbarë njerëzimin! Ndërsa përsëris afërsinë time me popullin martir ukrainas, ju ftoj të kujtoni viktimat e të gjitha konflikteve të armatosura dhe të luteni për dhuratën e paqes në Palestinë, Izrael dhe në mbarë Lindjen e Mesme, në Mianmar, në Kivu dhe në Sudan.
