கடவுளின் அன்பான உடனிருப்பை வெளிப்படுத்துபவர்கள் புனிதர்கள்

மெரினா ராஜ் - வத்திக்கான்

புனிதர்கள் பிரதிபலிக்கக்கூடிய ஒளியினால் சுடர்விடுகின்றார்கள் என்றும், கடவுளின் அன்பான உடனிருப்பைத் தங்களது எளிய அன்றாட செயல்கள் வழியாக வெளிப்படுத்துகின்றார்கள் என்றும் தன் டுவிட்டர் பக்கத்தில் குறுஞ்செய்தி ஒன்றினைப் பதிவிட்டுள்ளார் திருத்தந்தை பிரான்சிஸ்.

பிப்ரவரி 10 சனிக்கிழமை தூய ஸ்கொலாஸ்திகா என்னும் இத்தாலி நாட்டுப் புனிதரின் நினைவுநாளை திருஅவை சிறப்பிக்கும் வேளையில் ஹேஸ்டாக் புனிதர்கள் என்ற தலைப்பில் இவ்வாறு தனது கருத்துக்களை டுவிட்டர் குறுஞ்செய்தியாகப் பதிவிட்டுள்ளார் திருத்தந்தை பிரான்சிஸ்.

முடியாதவற்றை முடித்துக் காட்டும் ஆற்றல் கொண்ட இறைவனின் அன்புப் பிரசன்னத்தை, தங்களது எளிய அன்றாட செயல்கள் வழியாகப் புனிதர்கள் எடுத்துரைக்கின்றனர், சுடர்விடும் ஒளிபோன்று பிரகாசிக்கின்றனர் என்பதே திருத்தந்தையின் டுவிட்டர் குறுஞ்செய்தி உணர்த்துவதாகும்.

நமீபியா முன்னாள் குடியரசுத்தலைவர் இறப்பிற்கு திருத்தந்தை இரங்கல் தந்தி

நமீபியா முன்னாள் குடியரசுத்தலைவர் திரு HAGE G. GEINGOB அவர்களின் இறப்பிற்கு தனது ஆழ்ந்த இரங்கலையும் செபத்தையும் தெரிவித்துள்ள திருத்தந்தை அவர்கள், அரசுத்தலைவரின் அர்ப்பணிப்புள்ள பணியார்வத்தை நினைவுகூர்ந்து அவரின் ஆன்மா இறைவனில் நித்ய இளைப்பாற்றி அடைய தான் செபிப்பதாகவும். குறிப்பிட்டுள்ளார்.

தனது 82ஆவது வயதில் இறந்த குடியரசுத்தலைவரின் மறைவினால் வருந்தும் அவரது குடும்பத்தார் மற்றும் நமீபியா குடியரசு மக்கள் அனைவருக்கும் தன் ஆழ்ந்த இரங்கலையும் உடனிருப்பையும் தெரிவிப்பதாக எடுத்துரைத்துள்ளார் திருத்தந்தை

திருத்தந்தையின் இந்த இரங்கல் தந்திச்செய்தியானது திருப்பீடச்செயலர் கர்தினால் பியத்ரோ பரோலின் அவர்கள் கையொப்பமிடப்பட்டு நமீபியா குடியரசுத்தலைவர் NANGOLO MBUMBA என்பவருக்கு அனுப்பப்பட்டுள்ளது.