மக்களின் குரலுக்கு இறைவன் செவிமடுக்க செபிப்போம்

கிறிஸ்டோபர் பிரான்சிஸ் – வத்திக்கான்

தங்களின் குரல் செவிமடுக்கப்படும் என்ற ஆழமான நம்பிக்கையில் செபித்துவருவோருக்காக நாமும் நம் செபங்களை இறைவனை நோக்கி எழுப்புவோம் என்ற விண்ணப்பத்தை விடுத்துள்ளார் திருத்தந்தை பிரான்சிஸ்.

இறைவேண்டல் ஆண்டை திருஅவை சிறப்பித்துவரும் இவ்வேளையில், இறைவேண்டல் ஆண்டு என்ற ஹேஷ்டாக்குடன் பிப்ரவரி 13, செவ்வாய்க்கிழமையன்று தன் டுவிட்டர் குறுஞ்செய்தியை வெளியிட்டுள்ள திருத்தந்தை, இவ்வுலகின் பல நிகழ்வுகள், மக்கள் அமைதியிலும் மகிழ்விலும் வாழ்வதற்கு தடையாக இருக்கின்றன என்ற கவலையை வெளியிட்டுள்ளதோடு, இறைவன் தங்கள் குரலுக்கு செவிமடுப்பார் என்ற நம்பிக்கையுடன் அவரை நோக்கி குரலெழுப்பும் மக்களுக்கு இறைவன் செவிசாய்க்கவேண்டும் என அவரை நோக்கி அம்மக்களின் சார்பாக நம் செபங்களை எழுப்புவோம் என அனைவரையும் விண்ணப்பித்துள்ளார்.

12 ஆண்டுகளுக்கு முன்னர் 2012ஆம் ஆண்டு பிப்ரவரி மாதம் முன்னாள் திருத்தந்தை 16ஆம் பெனடிக்ட் அவர்களால் துவக்கப்பட்ட திருத்தந்தையரின் டுவிட்டர் பக்கத்தில் இதுவரை ஆங்கிலத்தில் 5300 குறுஞ்செய்திகள் வெளியிடப்பட்டுள்ளன. இதுவரை திருத்தந்தையரின் ஆங்கில டுவிட்டர் பக்கத்தை 1 கோடியே 86 இலட்சத்திற்கும் மேற்பட்டோர் பார்வையிட்டுள்ளனர்.