15 அருளாளர்கள் புனிதர் நிலைக்கு உயர்த்தப்பட திருத்தந்தை ஒப்புதல்

மெரினா ராஜ் – வத்திக்கான்

அருளாளர் கார்லோ அகுதீஸ் உட்பட 15 அருளாளர்கள் புனிதர் நிலைக்கு உயர்த்தப்பட திருத்தந்தை பிரான்சிஸ் அவர்கள் ஜூலை 1 திங்கள் கிழமை ஒப்புதல் அளித்துள்ளார்.

ஜுலை 1 திங்கள் கிழமை காலை வத்திக்கான் திருத்தூது மாளிகையில் கூடிய கர்தினால்கள் அவையின் பொதுக்கூட்டத்தின்போது இந்த ஒப்புதல்களை வெளியிட்டார் திருத்தந்தை பிரான்சிஸ்.

அருளாளர்கள் புனிதர்களாக அறிவிக்கப்பட இருப்பதற்கான காரணங்களை கர்தினால்கள் மறுஆய்வு செய்வதற்கு முன்பு நடைபெற்ற முற்பகல் செப வழிபாட்டிற்கு திருத்தந்தை பிரான்சிஸ் அவர்கள் தலைமை தாங்கி வழிநடத்தினார். அதன்பின் அருளாளர், மற்றும், புனிதர்களாக உயர்த்தப்படும் வழிமுறைகளை ஒருங்கிணைக்கும் பேராயத்தின் தலைவர் கர்தினால் மார்செல்லோ செமெராரோ அவர்கள், 15 அருளாளர்களின் வாழ்க்கை மற்றும் அற்புதங்கள் பற்றிய சுருக்கமான அறிக்கையை வாசித்தார்.

15 அருளாளர்கள் புனிதர் நிலைக்கு உயர்த்தப்பட உள்ளனர்

சிரியாவின் தமாஸ்கஸ் பகுதியில் 1860 ஆம் ஆண்டு அருள்பணி Manuel Ruiz López, OFM, அவருடைய உடன் தோழர்கள் எழுவர், மூன்று உடன் சகோதரர்களான Abdel Moati, Francis, Raphael Massabki ஆகிய பதினொருவர் சிரியா போரில் மறைசாட்சிகளாகக் கொல்லப்பட்டனர்.

மேலும் இத்தாலியைச் சார்ந்த அருளாளர் அருள்பணி Giuseppe Allamano, அருள்சகோதரி Elena Guerra, கனடா நாட்டைச் சார்ந்த அருள்சகோதரி Marie-Léonie Paradis மற்றும் இளம்அருளாளாரான கார்லோ அகுதீஸ் ஆகியோர் புனிதர் நிலைக்கு உயர்த்தப்பட உள்ளனர்.  

அருள்பணி Giuseppe Allamano 20 ஆம் நூற்றாண்டில் கொன்சோலாத்தா சபையை நிறுவியவராவார். அருள்சகோதரி Elena Guerra, இளம் சிறுமிகளுக்குக் கல்விப் பணியாற்ற தன் வாழ்வை அர்ப்பணித்து 19ஆம் நூற்றாண்டின் பிற்பகுதியில் தூய ஆவி ஒப்லாத்தி சபையை நிறுவியர். அருள்சகோதரி Marie-Léonie Paradis திருக்குடும்பத்தின் சிறிய சகோதரிகள் சபையை 20ஆம் நூற்றாண்டின் தொடக்கத்தில் உருவாக்கியவர்.

2024ஆம் ஆண்டு அக்டோபர் 20 அன்று இந்த 14 அருளாளர்களும் புனிதர் நிலைக்கு உயர்த்தப்பட இருக்கின்றனர். அருளாளர் கார்லோ அகுதீஸ் புனிதராக உயர்த்தப்பட இருக்கும் நாளை, திருப்பீடமானது விரைவில் முடிவு செய்து அறிவிக்க உள்ளது.