திருத்தந்தையின் நவம்பர், டிசம்பர் மாத திருவழிபாட்டு நிகழ்வுகள்

மெரினா ராஜ் – வத்திக்கான்

திருத்தந்தை பிரான்சிஸ் அவர்கள் நவம்பர் மற்றும் டிசம்பர் மாதங்களில் பங்கேற்று சிறப்பிக்க இருக்கும் திருவழிபாட்டு நிகழ்வுகள் பற்றிய அட்டவணையை திருப்பீடத்தின் திருவழிபாட்டுத்துறையின் தலைவர் பேராயர் Diego Ravelli அவர்கள் வெளியிட்டார்.

நவம்பர் 4 திங்கள்கிழமை வத்திக்கான் தூய பேதுரு பெருங்கோவிலில் உரோம் உள்ளூர் நேரம் காலை 11 மணியளவில் திருப்பீடத்தில் பணியாற்றி மறைந்த கர்தினால்கள் மற்றும் ஆயர்களுக்கான நினைவு திருப்பலியினை நிறைவேற்ற உள்ளார் திருத்தந்தை பிரான்சிஸ்.

நவம்பர் 17 ஞாயிற்றுக்கிழமை உரோம் உள்ளூர் நேரம் காலை 10 மணியளவில் வத்திக்கான் தூய பேதுரு பெருங்கோவிலில் ஏழை எளியோருக்கான திருப்பலியினை நிறைவேற்ற உள்ளார்.

நவம்பர் 24 ஞாயிற்றுக்கிழமை காலை 9.30 மணியளவில் கிறிஸ்து அரசர் பெருவிழாவன்று இளையோர்கான உலக நாள் ஆடம்பரத் திருப்பலியை வத்திக்கான் தூய பேதுரு பெருங்கோவிலில் சிறப்பிக்க உள்ளார்.

டிசம்பர் 7 சனிக்கிழமை மாலை 4 மணியளவில் தூய பேதுரு பெருங்கோவிலில் புதிய கர்தினால்களை உருவாக்குவதற்கான பொது அமர்வுக் கூட்டத்திற்கு தலைமையேற்கும் திருத்தந்தை பிரான்சிஸ் அவர்கள், மறுநாள் டிசம்பர் 8 ஞாயிற்றுக்கிழமை அன்னை மரியின் அமல உற்பவப் பெருவிழாவன்று 21 புதிய கர்தினால்களை அறிவிக்கும் ஆடம்பர திருப்பலிக்கும் தலைமையேற்று சிறப்பிக்க உள்ளார்.

மேலும் அன்று மாலை 4 மணியளவில் உரோம் நகர், ஸ்பானிய வளாகத்தில் அமைந்துள்ள அமல உற்பவ அன்னை மரியா திருஉருவத்திற்கு மாலை அணிவித்து பாரம்பரிய முறைப்படி வணக்கம் செலுத்தும் செப வழிபாட்டிலும் பங்கேற்க உள்ளார் திருத்தந்தை பிரான்சிஸ்.

டிசம்பர் 12 வியாழன் அன்று குவாதலுப்பே அன்னை மரியா திருவிழாவை முன்னிட்டு திருப்பலியை உரோம் உள்ளூர் நேரம் மாலை 6 மணியளவில் தூய பேதுரு பெருங்கோவிலில் சிறப்பிக்க உள்ளார் திருத்தந்தை பிரான்சிஸ்.