நவம்பர்-டிசம்பர் மாத திருத்தந்தையின் திருவழிபாட்டு விவரங்கள்

கிறிஸ்டோபர் பிரான்சிஸ் - வத்திக்கான்

நவம்பர் மாதம் முதல் தேதி முதல் டிசம்பர் மத்தி வரை திருத்தந்தை தலைமையேற்று நடத்தும் 5 திருப்பலிகள் உட்பட, ஏனைய நிகழ்ச்சிகள் குறித்த விவரங்களை வெளியிட்டுள்ளது திருப்பீடம்.

திருத்தந்தையின் திருவழிபாடுகளுக்கான அலுவலகம் வெளியிட்டுள்ள விவரங்களின்படி, கடந்த 12 மாத கால அளவில் உயிரிழந்த கர்தினால்கள் மற்றும் ஆயர்களுக்கான ஆன்ம இளைப்பாறுதல் திருப்பலி, நவம்பர் மாதம் 4ஆம் தேதி காலை 11 மணிக்கு வத்திக்கானின் புனித பேதுரு பெருங்கோவிலில் திருத்தந்தையின் தலைமையில் நிறைவேற்றப்படும்.

இவ்வாண்டு நவம்பர் 17ஆம் தேதி சிறப்பிக்கப்படும் திருஅவையின் எட்டாவது உலக வறியோர் தினத்திற்கான திருப்பலியை வத்திக்கான் புனித பேதுரு பெருங்கோவிலில் உரோம் நேரம் காலை 10 மணிக்கு நிறைவேற்ற உள்ளார் திருத்தந்தை பிரான்சிஸ். இவ்வாண்டின் வறியோர் தினத்திற்கென, “வறியோரின் ஜெபம் இறைவனை நோக்கி எழும்புகிறது” என்பது எடுக்கப்பட்டுள்ளது.

நவம்பர் மாதம் 24ஆம் தேதி கிறிஸ்து அரசர் பெருவிழாவுடன் இணைந்து மறைமாவட்ட அளவிலான உலக இளையோர் தினம் சிறப்பிக்கப்படும்போது, காலை 9.30 மணிக்கு வத்திக்கான் புனித பேதுரு பெருங்கோவிலில் திருத்தந்தையால் ஆடம்பரத் திருப்பலி  நிறைவேற்றப்படும்.

டிசம்பர் மாதம் 7ஆம் தேதி மாலை 4 மணிக்கு திருஅவையின் புதிய கர்தினால்களை உருவாக்கும் திருத்தந்தையின் பொது திருவழிபாட்டு கொண்டாட்டம் இடம்பெறும்.

அதற்கு அடுத்த நாள் டிசம்பர் 8ஆம் தேதி அமல உற்பவ அன்னை திருவிழாவின்போது, புதிய கர்தினால்கள் மற்றும் கர்தினால்கள் அவையுடன் இணைந்து புனித பேதுரு பெருங்கோவிலில் காலை 9.30 மணிக்கு திருப்பலி நிறைவேற்றுவார் திருத்தந்தை.  

பாரம்பரிய வழக்கப்படி, டிசம்பர் 8ஆம் தேதி மாலை 4 மணிக்கு உரோம் நகரின் மையப்பகுதியில் உள்ள இஸ்பாஞ்சா வளாகத்தில் அமல உற்பவ அன்னை திருஉருவச் சிலைக்கு மாலை அணிவித்து மரியாதை செலுத்துவார் திருத்தந்தை பிரான்சிஸ்.

டிசம்பர் மாதம் 12ஆம் தேதி குவாதலூப்பே அன்னை மரியாவின் திருவிழாவை முன்னிட்டு வத்திக்கான் புனித பேதுரு பெருங்கோவிலில் மாலை 6 மணிக்கு திருப்பலி நிறைவேற்றுவார் திருத்தந்தை.

டிசம்பர் 12ஆம் தேதி வரையுள்ள திருத்தந்தையின் திருவழிபாட்டுக் கொண்டாட்டங்கள் குறித்த விவரங்களை வெளியிட்டுள்ளது திருத்தந்தையின் திருவழிபாடுகளுக்கான திருப்பீடத்துறை.