கர்தினாலின் மறைவுக்கு இஸ்லாம் தலைமைக் குருவின் இரங்கல்

கிறிஸ்டோபர் பிரான்சிஸ் – வத்திக்கான்

மதங்களிடையே கலந்துரையாடலுக்கான திருப்பீடத்துறையின் தலைவர், கர்தினால் Miguel Ángel Ayuso Guixot அவர்களின் மறைவையொட்டி தன் ஆழ்ந்த அனுதாபங்களை வெளியிடும் இரங்கல் தந்தியை திருத்தந்தை பிரான்சிஸ் அவர்களுக்கு அனுப்பியுள்ளார் Al-Azhar இஸ்லாம் தலைமைக்குரு, பேராசிரியர் Ahmad Al-Tayyeb.

கர்தினாலின் இறப்பு குறித்து திருத்தந்தைக்கு தன் ஆழ்ந்த அனுதாபங்களை வெளியிடுவதாகவும், கர்தினாலின் குடும்பத்திற்கும் உறவினர்களுக்கும் அவரின் அன்புக்குரியவர்களுக்கும் இறைவன் ஆறுதலை வழங்க வேண்டும் என செபிப்பதாகவும் தெரிவித்துள்ளார், Al-Azhar இஸ்லாமிய தலைமைக் குரு.

மனித குலத்திற்கான அர்ப்பணிப்புடைய சேவையின் முன்னுதாரணமாக இருந்த கர்தினால், இஸ்லாமியர்களுடன் கத்தோலிக்க திருஅவையின் உறவுகளுக்கு பலமான பாலமாக இருந்தவர் எனவும், உடன்பிறந்த உணர்வு நிலை என்ற ஏடு தயாரிக்கப்படுவதற்கு அவரின் பங்களிப்பு மிகவும் முக்கியத்துவம் வாய்ந்தது எனவும், கர்தினாலின் மறைவு குறித்து திருத்தந்தைக்கு அனுப்பியுள்ள இரங்கல் தந்தியில் குறிப்பிட்டுள்ளார் இஸ்லாமிய தலைமைக்குரு Ahmad Al-Tayyeb.