கர்தினால்கள் அவையில் மேலும் 21 புதிய கர்தினால்கள் இணைப்பு

மெரினா ராஜ் - வத்திக்கான்

டிசம்பர் 7 சனிக்கிழமை உரோம் உள்ளூர் நேரம் மாலை 4.00 மணிக்கு, அதாவது இந்திய-இலங்கை நேரம் இரவு 8.30 மணிக்கு, வத்திக்கான் புனித பேதுரு பெருங்கோவிலில்  வளாகத்தில் நடைபெற்ற திருவழிபாட்டில் திருத்தந்தை பிரான்சிஸ் அவர்கள், புதிய கர்தினால்கள் 21 பேருக்கும், கர்தினால்களுக்குரிய Berretto எனப்படும் சிவப்புநிற தொப்பி, Zucchetto எனப்படும் தலையை ஒட்டி தலையில் வைக்கப்படும் சிறுவட்டத்தொப்பி, மோதிரம் ஆகியவற்றை அணிவித்தார்.

ஏறக்குறைய 5,500 திருப்பயணிகள் பெருங்கோவிலில் கூடியிருக்க கர்தினால்கள் அவையில் புதிய கர்தினால்களை இணைக்கும் சடங்கு திருத்தந்தை பிரான்சிஸ் அவர்கள் தலைமையில் நடைபெற்றது.

அன்னை மரியின் அமல உற்பவ பெருவிழாவிற்கு முந்தைய நாளில் நடைபெற்ற இச்சடங்கில் அல்ஜீரியா, ஆஸ்திரேலியா, ஈக்வதோர், ஈரான், செர்பியா என்னும் 5 புதிய நாடுகளைச் சேர்ந்த கர்தினால்களும் உருவாக்கப்பட்டனர்.      

21 புதிய கர்தினால்களுள் ஒருவரான கேரள மாநிலத்தின் சீரோ மலபார் தலத்திருஅவைக்கான கர்தினால் George Jacob Koovakad அவர்கள் கர்தினால்கள் அவையில் இணைக்கும் சடங்கு நிறைவுற்றதைத் தொடர்ந்து வத்திக்கான் செய்திகளுக்கு பதில் அளித்த போது நன்றியுணர்வுடன் இருப்பதாகவும், இறைவனின் வழியை இன்னும் அதிகமதிகமாகப் பின்பற்றுவதற்கான ஓர் அழைப்பாக உணர்வதாகவும் தெரிவித்தார்.

தன்னை விட தீவிரமான மேய்ப்புப்பணியினை ஆற்றும் பல கர்தினால்களைத் தான் காண்பதாக எடுத்துரைத்த கர்தினால் Koovakad அவர்கள்  இயேசுவின் சிலுவைப் பணியினைப் பின்பற்ற தான் அழைக்கப்பட்டதாக உணர்ந்ததை எடுத்துரைத்தார்.

புதிதாக நியமனம் செய்யப்பட்ட  21 கர்தினால்கள் உட்பட மொத்தம் உள்ள 253 கர்தினால்களில் 140 பேர் வாக்குரிமை பெற்றவர்கள் 113 பேர் வாக்குரிமை இல்லாதவர்கள்.

முன்னாள் அப்போஸ்தலிக்க தூதுவரான கர்தினால் Angelo Acerbi, பெருவின் லீமா உயர் மறைமாவட்ட பேராயர் கர்தினால் Carlos Gustavo Castillo Mattasoglio, அர்ஜெண்டினாவின் சந்தியாகு உயர் மறைமாவட்ட பேராயர் கர்தினால் Vicente Bokalic Iglic, எக்குவதோரின் Guayaquil உயர் மறைமாவட்ட பேராயர் கர்தினால் Cabrera Gerardo Cabrera Herrera, சிலியில் உள்ள சந்தியாகு உயர்மறைமாவட்ட பேராயர் கர்தினால் Natalio Chomalí Garib, ஜப்பானின் டோக்கியோ உயர்மறைமாவட்ட பேராயர் கர்தினால் Tarcisio Isao Kikuchi, பிலிப்பீன்ஸின் Kalookan மறைமாவட்ட ஆயர் கர்தினால் Pablo Virgilio Siongco David, செர்பியாவின் Beograd -Smederevo உயர்மறைமாவட்ட பேராயர் கர்தினால் Ladislav Nemet, Porto Alegre உயர்மறைமாவட்ட பேராயர் கர்தினால் Jaime Spengler, ஐவரி கோஸ்டின் Abidjan உயர்மறைமாவட்ட பேராயர் கர்தினால் Ignace Bessi Dogbo, Algeriaவின் Alger உயர்மறைமாவட்ட ஆயர் கர்தினால் Jean-Paul, இந்தோனேசியாவின் போகோர் மறைமாவட்ட ஆயர் கர்தினால் Paskalis Bruno Syukur, ஈரானின் Teheran Ispahan உயர்மறைமாவட்ட பேராயர் கர்தினால் Joseph Mathieu, இத்தாலியின் தூரின் உயர்மறைமாவட்ட பேராயர் கர்தினால் Roberto Repole, உரோம் மறைமாவட்ட அதிபர் தந்தையான கர்தினால் Baldassare Reina, கனடாவின் Toronto உயர்மறைமாவட்ட பேராயர் கர்தினால், Francis Leo, உரோம் தூய மேரி மேஜர் பெருங்கோவிலின் இணைப்பேராயர் கர்தினால் Rolandas Makrickas, உக்ரைனின் Melbourne மறைமாவட்ட ஆயர் Mykola Bychok இறையியலாளர் கர்தினால் Timothy Peter Joseph Radcliffe, ஒருங்கிணைந்த மனித மேம்பாட்டுப் பணிக்கான திருப்பீடத்துறையின் துணைச் செயலாளர் கர்தினால் Fabio Baggio, திருத்தந்தை பிரான்சிஸ் அவர்களின் திருத்தூதுப்பயணங்களுக்குப் பொறுப்பான கர்தினால் George Jacob Koovakad ஆகிய 21 கர்தினால்களை திருத்தந்தை புதிதாக திருஅவைப்பணிக்காக நியமித்தார்.