ር.ሊ.ጳ ፍራንችስኮስ “የገና በዓል ለዓለማችን ሰላምን ያመጣል እና ሀዘንን ወደ ደስታ ይለውጣል” አሉ

ይህ በዓል በቫቲካን በተከበረበት ወቅት ርዕሠ ሊቃነ ጳጳሳት ፍራንችስኮስ ልማዳዊ በሆነ መልኩ በላቲን ቋንቋ (“Urbi et Orbi” የላቲን ቋንቋ ሀረግ ነው “ኡርቢ እና ኦርቢ” ከሚባሉት ሁለት ስሞች የተዋቀረ ሲሆን “ኡርቢ” ማለት "ከተማ ‘ሮም’ (ለጥንቶቹ ሮማውያን የሮም ከተማ ኡርቢ ማለት ነው) "ኦርቢ" ማለት “አለም” ማለት ነው) በአጠቃላይ ለከተማው እና ለዓለም ማለት ሲሆን አንድ የካቶሊክ ቤተክርስቲያን ርዕሰ ሊቃነ ጳጳሳት በታላላቅ መንፈሳዊ በዓላት ቀን ልማዳዊ በሆነ መልኩ በዓላትን አስታከው የሚያስተላልፉት መልእክት እና የሚሰጡትን ቡራኬ ይወክላል)፣ በዚህ መሰረት ቅዱስነታቸው የአጎርጎሮሳዊያኑን የቀን አቆጣጠር በሚከተሉ የማህበረሰብ ክፍሎች ዘንድ ሰኞ ታኅሣሥ 15/2016 ዓም የተከበረውን የጌታችን የኢየሱስ ክርስቶስ የልደት በዓል አስመልክተው በቅዱስ ጴጥሮስ አደባባይ ለተገኙ ምዕመናን ባስተላለፉት መልእክት እንደ ገለጹት“የገና በዓል ለዓለማችን ሰላምን ያመጣል እና ሀዘንን ወደ ደስታ ይለውጣል” ማለታቸው ተገለጸ።

የእዚህ ዝግጅት አቅራቢ መብራቱ ኃ/ጊዮርጊስ ቫቲካን

ክቡራን እና ክቡራት የዝግጅቶቻችን ተከታታዮች ርዕሰ ሊቃነ ጳጳሳት ፍራንችስኮስ በወቅቱ ያደረጉትን “ኡርቢ እና ኦርቢ” መልእክት ሙሉ ይዘቱን እንደሚከተለው አሰናድተነዋል፣ እንድትከታተሉን ከወዲሁ እንጋብዛለን።

የተወደዳችሁ ወንድሞቼ እና እህቶቼ እንደምን አረፈዳችሁ! መልካም የገና በዓል ይሁንላችሁ!

በዓለም ዙሪያ ያሉ የክርስቲያኖች ዓይኖች እና ልብ ወደ ቤተልሔም ዘወር ብለዋል፣ በዚህ ዘመን፣ የሐዘንና የዝምታ ቦታ ቢሆንም በጉጉት ሲጠበቅ የነበረው መልእክት በመጀመሪያ የታወጀው “ዛሬ በዳዊት ከተማ መድኃኒት እርሱም ክርስቶስ ጌታ የሆነ ተወልዶላችኋል” (ሉቃ. 2፡11) የሚለው ነው። በቤተልሔም በላይ በሰማይ ያለው መልአክ የተናገራቸው እነዚያ ቃላት ለእኛም በተመሳሳይ መልኩ ተነግሮናል። ጌታ ስለ እኛ እንደተወለደ ስንገነዘብ በተስፋ እና በመተማመን የተሞላን እንሆናለን፣ የአብ የዘላለም ቃል ወሰን የሌለው አምላክ መኖሪያውን በእኛ መካከል እንዳደረገ ነው። ሥጋ ለበሰ በመካከላችን ሊያድር መጣ (ዮሐ 1፡14)። የታሪክን ሂደት የለወጠው ይህ መልካም ዜና ነው!

ርእሰ ሊቃነ ጳጳሳት ፍራንችስኮስ "የኡርቢ እና ኦርቢ" መልእክት ከቫቲካን ሆነው ስያስተላልፉ

የቤተልሔም መልእክት በእርግጥም “የታላቅ ደስታ የምሥራች” ነው (ሉቃስ 2፡10)። ምን ዓይነት ደስታ ነው? የሚያልፈው የዚህ ዓለም ደስታ አይደለም፣ የመዝናኛ ደስታ ሳይሆን “ትልቅ” የሆነ ደስታ ታላቅ ስለሚያደርገን ነው። ለዛሬ ሁላችንም በሁሉም ድክመቶቻችን፣ ከዚህ በፊት ታይቶ የማያውቅ የጸጋ ስጦታ የሆነውን የመንግስተ ሰማያትን የመወለድ ተስፋን እንቀበላለን። አዎን ወንድማችን ኢየሱስ አባቱን አባታችን ሊያደርግ መጣ፣ አንድ ትንሽ ልጅ የእግዚአብሔርን ርኅራኄ ፍቅር ይገልጥልናል እና ብዙ ተጨማሪ ነገር ያመጣልናል። እርሱ የአብ አንድያ ልጅ “የእግዚአብሔር ልጆች እንድንሆን ኃይልን” ይሰጠናል (ዮሐ. 1፡12)። ይህ ልብን የሚያጽናና ተስፋን የሚያድስ እና ሰላምን የሚሰጥ ደስታ ነው። የመንፈስ ቅዱስ ደስታ ነው፡ የእግዚአብሔር የተወደዱ ወንድና ሴት ልጆች በመሆናችን የተወለደ ደስታ።

ርእሰ ሊቃነ ጳጳሳት ፍራንችስኮስ በገና በዓል ቀን ጦርነት እንዲያበቃ ሲማጸኑ የምያሳይ ምስል

ወንድሞች እና እህቶች፣ ዛሬ በቤተልሔም ውስጥ፣ ምድሪቱን በሸፈነው ጥልቅ ጥላ መካከል፣ የማይጠፋ የእሳት ነበልባል ተለኮሰ። ዛሬ የዓለም ጨለማ የተሸነፈው በእግዚአብሔር ብርሃን ነው፣ እሱም “ለወንድና ለሴት ሁሉ ያበራል” (ዮሐ 1፡9)። በዚህ የጸጋ ስጦታ ደስ ይበለን! አንተ ብቻህን አይደለህምና በእርግጠኛነትህ ላይ እምነት ያጣህ አንተ ደስ ይበልህ፤ ክርስቶስ ስለ አንተ ተወልዷል። አንተ ተስፋን ሁሉ ያጣህ ደስ ይበልህ፤ እግዚአብሔር የተዘረጋ እጁን ሰጥቶሃልና። ከፍርሃትህ ነፃ እንዲያወጣህ፣ ከሸክምህ እንዲገላገልህ እና በዓይኑ ውስጥ ከምንም ነገር የበለጠ ዋጋ እንዳለህ እንዲያሳይህ፣ የትንሹን ሕፃን ልጁን እጁን ያቀርብልሃል እንጂ ወደ አንተ ጣት አይቀስርም።የልብ ሰላም ያጣህ አንተ ሆይ ደስ ይበልህ፣ የነቢዩ ኢሳያስ ጥንታዊ ትንቢት ስለ እናንተ ተፈጽሞአልና፡- “ሕፃን ተወልዶልናልና ወንድ ልጅም ተሰጥቶናልና፤ ስሙም የሰላም አለቃ ተብሎ ይጠራል” (ኢሳያስ 9፡6) ከእርሱ ጋር፣“መጨረሻ የሌለው ሰላም ይሆናል” (ኢሳያስ 9፡7)።

የቫቲካን የክቡር ዘበኛ አባላት በቅዱስ ጴጥሮስ አደባባይ

በቅዱሳት መጻሕፍት ውስጥ የሰላም አለቃ እና “የዚህ ዓለም አለቃ” (ዮሐ 12፡31) ማን እንደ ሆኑ ይቃወማል፣ እሱም የሞት ዘርን በመዝራት፣ “ሕይወትን በሚወደው” በጌታ ላይ ያሴራል (መ. ጥበብ 11፡26) የእዚህ አዳኝ መወለድን ተከትሎ ንጹሐን የሆኑ ሕጻናት በቤተልሔም ሲታረዱ እናያለን። በአለማችን ስንት ንፁሀን እየታረዱ ነው! በእናቶቻቸው ማኅፀን ውስጥ፣ በተስፋ መቁረጥ እና በተስፋ ፍለጋ መንገድ ላይ መሄድ የተሰላችሁ፣ በእነዚያ ሁሉ ትንንሽ ልጆች ሕይወት ውስጥ የልጅነት ጊዜያቸው በጦርነት የተጎዱ ሁሉ። የዛሬዎቹ ታናናሾቹ ኢየሱስ ናቸው።

ለሰላም አለቃ “አዎን” ብለን አዎንታዊ ምላሽ መስጠት ማለት ጦርነትን፣ ጦርነትን ሁሉ፣ የጦርነትን አስተሳሰብ፣ ዓላማ የሌለውን ጉዞ፣ ያለአሸናፊዎች መሸነፍ፣ የማያመካኝ ቂልነት ማለት ነው። ለጦርነት "አይ" ማለት ለጦር መሳሪያን "አይ" ማለት ነው። የሰው ልብ ደካማ እና ስሜታዊ ነው፣ የሞት መሳሪያ በእጃችን ካገኘን ይዋል ይደር እንጂ እንጠቀመዋለን። የጦር መሣሪያ ምርት፣ ሽያጭና ንግድ እየጨመረ በሄደበት ወቅት ስለ ሰላም እንኳን እንዴት እንናገራለን? ዛሬም እንደ ሄሮድስ ዘመን የእግዚአብሔርን ብርሃን የሚቃወመው ክፋት በግብዝነት እና በመደበቅ ሴራውን እየሰራ ይገኛል። ለብዙዎች ሳይታወቅ መሰማት በማይችል ጸጥታ ውስጥ ምን ያህል ግፍ እና ግድያ ይፈጸማል! መሳሪያን ሳይሆን ዳቦን የሚሻ፣ ኑሮን ለማሸነፍ የሚታገል እና ሰላምን ብቻ የሚሻ ህዝብ ምን ያህል የህዝብ ገንዘብ ለመሳሪያ እንደሚውል አያውቅም። ይህ ግን ሊያውቁት የሚገባ ነገር ነው! የአሻንጉሊት ጦርነቶችን የሚያንቀሳቅሱትን ጥቅሞች እና ትርፎች ግልጽ ለማድረግ መነጋገር እና መፃፍ አለባቸው።

የሰላሙን ልዑል የተነበየው ኢሳይያስ “ሕዝብ በሕዝብ ላይ ሰይፍ የማያነሳበት” ሰዎች “ከእንግዲህ ወዲህ ጦርነት የማይማሩበት”፣ ይልቁንም “ሰይፋቸውን ማረሻ ለማድረግ የሚቀጠቅጡበት፣ ጦራቸውንም ወደ ማረሻ ለመለወጥ የሚቀጠቅጡበት ቀን” ይጠባበቃል (ኢሳያስ 2፡4)። በእግዚአብሔር እርዳታ ለዚያ ቀን መምጣት ለመስራት የተቻለንን ጥረት እናድርግ!

በጋዛ የሚገኙ ከጦርነት የተረፉ ሕጻናት እና ቤተሰቦቻቸው በመጠልያ ድንኳን ውስጥ

ይህ ሰላም ጦርነት የእነዚያን ህዝቦች ህይወት እያወደመ ወደ አለበት እስራኤል እና ፍልስጤም ይምጣ። ሁሉንም በተለይም የጋዛ ክርስቲያን ማህበረሰቦችን እና መላውን ቅድስት ሀገር በእቅፌ ውስጥ አኖራለሁ።  ባለፈው እ.አ.አ በጥቅምት 7/2023 ዓ.ም በተፈጸመው አስጸያፊ ጥቃት ሰለባ ለሆኑት ልቤ አዝኗል፣ እናም አሁንም በእገታ ላይ ያሉ ሰዎች ነፃ እንዲወጡ በአስቸኳይ ጥሪዬን በድጋሚ አቀርባለሁ። የንጹሃን የሲቪል ተጎጂዎች ሰዎችን እየቀጠፈ የሚገኘው ወታደራዊ ዘመቻ እንዲያቆም እማጸናለሁ እናም ለሰብአዊ ዕርዳታ ክፍት በማድረግ ተስፋ አስቆራጭ ሰብአዊ ሁኔታን ለመፍታት ጥረት እንዲደረግ እጠይቃለሁ ። የሁከትና የጥላቻ መቀጣጠል ይብቃ። እናም የፍልስጤም ጥያቄ በፓርቲዎች መካከል በቅንነት እና በጽናት በሚደረግ ውይይት፣ በጠንካራ የፖለቲካ ፍላጎት እና በአለም አቀፉ ማህበረሰብ ድጋፍ የሚፈታ ይሁን።

ሀሳቤም እንዲሁ በጦርነት ወደምታመሰው የሶሪያ ህዝብ እና ወደ የመን ታጋሽ ወገኖቻችን ጭምር ላይ ነው። እኔም ስለ ተወዳጅ የሊባኖስ ሰዎች አስባለሁ፣ እናም በቅርቡ የፖለቲካ እና የማህበራዊ መረጋጋት እንዲፈጠር እጸልያለሁ።

ሕፃኑን ኢየሱስን እያሰላሰልኩ፣ ለዩክሬን ሰላምን እለምናለሁ። በእያንዳንዳችን ድጋፍ፣ የእግዚአብሔር ፍቅር ተጨባጭ እውነታ እንዲሰማቸው መንፈሳዊ እና ሰብዓዊ ቅርበታችንን ለሚሰቃዩ ሰዎች ያለንን አጋርነት እናድስ።

በአርሜኒያ እና አዘረበጃን ያለው የጦርነት ውጥረት እንዲቀረፍ ቅዱስነታቸው ጸሎት አድርሰዋል

በአርሜንያ እና በአዘርባጃን መካከል ያለው አስተማማኝ የሰላም ስምምነት ቀን ቅረብ ይሁን። በሰብአዊ ርምጃዎች ፣ ስደተኞች በህጋዊ እና በደህንነት ወደ ቤታቸው በመመለስ እና ለሃይማኖታዊ ወጎች እና የእያንዳንዱ ማህበረሰብ የአምልኮ ቦታዎችን በማክበር ይራመድ።

የአርሜኒያ ስደተኞች ከጦርነት ሲሸሹ የምያሳይ ምስል

የሳህልን አካባቢ፣ የአፍሪካ ቀንድ እና ሱዳንን፣ እንዲሁም ካሜሩንን፣ ዴሞክራቲክ ሪፐብሊክ ኮንጎን እና ደቡብ ሱዳንን የሚያስጨንቁ ውጥረቶችን እና ግጭቶችን አንርሳ።

ለዘላቂ ሰላም ምቹ ሁኔታዎችን መፍጠር የሚችሉ የውይይት እና የእርቅ ሂደቶችን በማካሄድ በኮሪያ ልሳነ ምድር የወንድማማችነት ትስስር የሚጠናከርበት ቀን ቅርብ ይሁን።

ከጦርነት የሚሸሹ የሱዳን ስደተኞች

ታማኝ ሕፃን የሆነው የእግዚአብሔር ልጅ በዩናይትድ ስቴትስ ውስጥ ያሉ የፖለቲካ ባለሥልጣናትን እና በጎ ፈቃድ ያላቸውን ሰዎች ሁሉ ማህበራዊ እና ፖለቲካዊ ግጭቶችን ለመፍታት ተስማሚ መንገዶች እንዲቀየሱ ፣ የሰዎችን ክብር የሚነኩ ድህነትን ለመዋጋት እና ኢእኩልነትን ለመቀነስ ያነሳሱ። እናም የስደት እንቅስቃሴዎችን አስጨናቂ ክስተት ለመፍታት ይርዳቸው።

ከግርግም ሕፃኑ ኢየሱስ ድምፅ ለሌላቸው ሰዎች ድምፅ እንድንሆን ጠየቀን። በእንጀራና በውኃ እጦት የሞቱት የንጹሐን ልጆች ድምፅ፣ ሥራ ማግኘት የማይችሉ ወይም ሥራ ያጡ ሰዎች ድምፅ፣ በአሰቃቂ ጉዞዎች ሕይወታቸውን ለአደጋ በማጋለጥ የተሻለ የወደፊትን ፍለጋ ከአገራቸው እንዲሰደዱ የተገደዱ ሰዎች ድምፅ እንድናዳምጥ ኢየሱስ ይጠይቀናል።

ወንድሞች እና እህቶች፣ ከአንድ አመት በኋላ የሚጀመረው የኢዮቤልዩ የጸጋ እና የተስፋ ወቅት እየቀረበ ነው። ይህ የቅዱስ ዓመት የዝግጅት ጊዜ ልቦችንን ለመለወጥ፣ ጦርነትን ውድቅ ለማድረግ እና ሰላምን ለመቀበል እና ለጌታ ጥሪ በደስታ ምላሽ የምንሰጥበት፣ በኢሳይያስ ትንቢት ቃል “የምስራች የምናመጣበት አጋጣሚ ይሁን። ለተገፉት፣ ልባቸው የተሰበረውን ይጠግን ዘንድ፣ ለታሰሩትም ነጻነትን እናውጅ ዘንድ፣ ለታሰሩትም መፈታትን ያውጃል” (ኢሳያስ 61፡1)።

እነዚያ ቃላት የተፈጸሙት ዛሬ በቤተልሔም በተወለደው በኢየሱስ (ሉቃስ 4፡18) ነው። እሱን እንቀበል! ለእርሱ ልባችንን እንክፈት፣ እርሱም አዳኝ የሰላም አለቃ ነው!

ርእሰ ሊቃነ ጳጳሳት ፍራንችስኮስ በቫቲካን በሚገኘው በቅዱስ ጴጥሮስ አደባባይ