ር.ሊ.ጳ. ፍራንችስኮስ የኢየሱስ ጥምቀት በድነት ታሪክ ውስጥ የነበረውን ቁልፍ ጊዜን ያመለክታል አሉ!

ርዕሰ ሊቃነ ጳጳሳት ፍራንችስኮስ ዘወትር ረቡዕ እለት በቫቲካን በሚገኘው በጳውሎስ 6ኛ የመሰብሰቢያ አዳራሽ ለሚሰበሰቡ ምዕመናን የጠቅላላ የትምህርተ ክርስቶስ አስተምህሮ እንደሚያደርጉ የሚታወቅ ሲሆን በእዚህ መሠረት ቅዱስነታቸው በነሐሴ 15/2016 ዓ.ም ያደረጉት የጠቅላላ የትምህርተ ክርስቶስ አስተምህሮ ከዚህ ቀደም "መንፈስ ቅዱስ እና ሙሽራይቱ፣ መንፈስ ቅዱስ የእግዚአብሔርን ሰዎች ከኢየሱስ ጋር እንዲገናኙ ይረዳቸዋል" በሚል ዐብይ አርዕስት ጀምረው ከነበረው የጠቅላላ የትምህርተ ክርስቶስ አስተምህሮ ቀጣይና "መንፈስ ቅዱስ በእኔ ላይ ነው፥ መንፈስ ቅዱስ በኢየሱስ ጥምቀት ውስጥ" በሚል ንዑስ አርዕስት ባደረጉት የክፍል 6 አስተምህሮ የኢየሱስ ጥምቀት በድነት ታሪክ ውስጥ የነበረውን ቁልፍ ጊዜን ያመለክታል ማለታቸው ተገልጿል።  

በእለቱ የተነበበው የመጽሐፍ ቅዱስ ቃል

"ጴጥሮስም እንዲህ ሲል መናገር ጀመረ፤ “እግዚአብሔር ለማንም እንደማያዳላ በርግጥ ተረድቻለሁ፤  ዮሐንስ ከሰበከው ጥምቀት በኋላ ከገሊላ ጀምሮ በመላው ይሁዳ የሆነውን ታውቃላችሁ፤ እግዚአብሔር የናዝሬቱን ኢየሱስ በመንፈስ ቅዱስና በኀይል ቀባው፤ እርሱም እግዚአብሔር ከእርሱ ጋር ስለ ነበረ በደረሰበት ሁሉ መልካም እያደረገ በዲያብሎስ ሥልጣን ሥር የነበሩትን ሁሉ ፈወሰ" (ሐዋ. 10፡34፣37-38)።

ክቡራን እና ክቡራት የዝግጅቶቻችን ተከታታዮች ርእሰ ሊቃነ ጳጳሳት ፍራንችስኮስ በወቅቱ ያደረጉትን የጠቅላላ የትምህርተ ክርስቶስ አስተምህሮ ሙሉ ይዘቱን እንደሚከተለው አሰናድተነዋል፣ ተከታተሉን።

የተወደዳችሁ ወንድሞቼ እና እህቶቼ እንደምን አረፈዳችሁ!

ዛሬ በዮርዳኖስ ወንዝ ጥምቀት በተደረገበት ወቅት በኢየሱስ ላይ ስለወረደው እና የእርሱ የሰውነት ክፍል ወደ ሆነቺው ወደ ቤተክርስቲያን ስለተሰራጨው መንፈስ ቅዱስ እንመለከታለን። በማርቆስ ወንጌል ውስጥ፣ ኢየሱስ የተጠመቀበት ሁኔታ እንደሚከተለው ተገልጿል፡- “በዚህ ጊዜ ኢየሱስ የገሊላ ከተማ ከሆነችው ከናዝሬት መጥቶ በዮርዳኖስ ወንዝ በዮሐንስ እጅ ተጠመቀ። ከውሃው በሚወጣበትም ጊዜ፣ ሰማያት ተከፍተው፣ መንፈስ ቅዱስ እንደ ርግብ በእርሱ ላይ ሲወርድ አየ፤ “የምወድድህ ልጄ አንተ ነህ፤ በአንተ ደስ ይለኛል” የሚል ድምፅ ከሰማይ ተሰማ (ማር. 1፡9-11) በማለት ስለሁኔታው ይናገራል።

በዚያን ጊዜ መላው ቅድስት ሥላሴ በዮርዳኖስ ወንዝ ዳርቻ ተገናኙ! በድምጽ የተወከለው አብ በእዚያ ሥፍራ ነበረ፣ በኢየሱስ ላይ በርግብ አምሳል የወረደው መንፈስ ቅዱስ በእዚያ ስፍራ ነበረ፥ አብም የሚወደው ልጁ መሆኑን የተናገረበት ቃል በእዚያ ሥፍራ ነበረ። የራዕይ እና የድነት ታሪክ መሰረታዊ ጊዜ ነበር።

ሁሉም ወንጌላውያን እንዲናገሩ ያደረጋቸው በኢየሱስ ጥምቀት ውስጥ በጣም አስፈላጊ የሆነው ነገር ምንድን ነው? መልሱን ያገኘነው ኢየሱስ ብዙም ሳይቆይ በናዝሬት ምኩራብ ውስጥ በዮርዳኖስ ያለውን ክስተት በግልፅ በመጥቀስ “የእግዚአብሔር መንፈስ በእኔ ላይ ነው፣ እርሱ ቀብቶኛልና” (ሉቃስ 4:18) የሚለውም ምላሽ እናገኛለን።

በዮርዳኖስ ውስጥ እግዚአብሔር አብ "በመንፈስ ቅዱስ የተቀባ" ማለትም ኢየሱስን ንጉስ፣ ነቢይ እና ካህን አድርጎ ቀደሰው። በእርግጥ በብሉይ ኪዳን ነገሥታት፣ነቢያትና ካህናት በዘይት ይቀቡ ነበር። በክርስቶስ ጉዳይ በሥጋዊ ዘይት ፋንታ መንፈስ ቅዱስ የሆነ መንፈሳዊ ዘይት አለ፣ ከምልክቱ ይልቅ እውነታው አለ።

ኢየሱስ ሥጋ ከለበሰበት የመጀመሪያው ቀን አንስቶ በመንፈስ ቅዱስ የተሞላ ነው። ይሁን እንጂ ይህ "የግል ጸጋ" ነበር፥ የማይተላለፍ፣ አሁን፣ ይልቁንስ፣ እንደ ራስ ሆኖ፣ ከአካሉ ጋር የሚገናኝ፣ እሱም ቤተክርስቲያን ለሆነው ተልዕኮው የመንፈስን ስጦታ ሙላት ይቀበላል። ለዚህ ነው ቤተክርስቲያን አዲሷ "ንጉሣዊ፣ ትንቢታዊ እና ካህናዊ" የሆነችው። “መሲህ” የሚለው የዕብራይስጥ ቃል እና ተዛማጅ የግሪኩ “ክርስቶስ” የሚለው ቃል ሁለቱም ኢየሱስን የሚያመለክቱና “የተቀባ” የሚለውን ትርጉም የሚሰጡን። “ክርስቲያን” የሚለው መጠሪያችን በቤተክርስቲያን አባቶች ዘንድ “ክርስቶስን በመምሰል የተቀቡ” በሚለው ትርጉም ይገለጻል።

በመጽሐፍ ቅዱስ ውስጥ በሊቀ ካህናቱ በአሮን ራስ ላይ ስለ ፈሰሰው እና እስከ ልብሱ ጫፍ ድረስ የሚወርድ ስለ ሽቱ ዘይት የሚናገር መዝሙር አለ (መዝ. 133፡2)። እንደ ወንድማማችነት አብሮ የመኖርን ደስታ ለመግለጽ የሚያገለግለው ይህ የግጥም ምስል በክርስቶስ እና በቤተክርስቲያን ውስጥ መንፈሳዊ እና ምስጢራዊ እውነታ ሆኗል። ክርስቶስ ራስ ነው፣ ሊቀ ካህናችን፣ መንፈስ ቅዱስ ጥሩ መዓዛ ያለው ዘይት ነው፤ ቤተ ክርስቲያን የምትስፋፋባት የክርስቶስ አካል ናት።

በመጽሐፍ ቅዱስ ውስጥ መንፈስ ቅዱስ በነፋስ የተመሰለበትን እና በእርግጥም ስሙ ሩአ የተባለበትን ምክንያት አይተናል። በዘይት የተመሰለው ለምን እንደሆነ እና ከዚህ ምልክት ምን ተግባራዊ ትምህርት ማግኘት እንችላለን ብለን እራሳችንን መጠየቅ ተገቢ ነው። በጸሎተ ሐሙስ መስዋዕተ ቅዳሴ ላይ “ምስጢረ ቀንዲል” በመባል የሚታወቀውን ዘይት በመቀደስ፣ ጳጳሱ በጥምቀት እና በስጢረ ሜሮን ቅብዓን የሚቀበሉትን በመጥቀስ፡- “በዚህም ቅዱስ በሆነው ዘይት የሚቀቡ ሁሉ ለግርማህ ቤተ መቅደስ የሚሰሩ ይሁኑ። ይህ ዘይት የበኵር ልደታቸውን እድፍ በማንጻት አንተን ደስ በሚያሰኝ ሕይወት ንጹሕ የሆነ መዓዛ ያላቸው ይሁኑ።  “እኛ ለእግዚአብሔር የክርስቶስ መዓዛ ነንና” (2ኛ ቆሮ 2፡15) በማለት ለቆሮንቶስ ሰዎች በጻፈው ከቅዱስ ጳውሎስ ቃል የተወሰደ ነው።

እንደ አለመታደል ሆኖ አንዳንድ ጊዜ ክርስቲያኖች የራሳቸው ኃጢአት መጥፎ ጠረን እንጂ የክርስቶስን መዓዛ እንደማያስፋፉ እናውቃለን። ነገር ግን፣ ይህ እኛ የምንችለውን ያህል እና እያንዳንዱ በየአካባቢው ውስጥ፣ በአለም ውስጥ ያለው የክርስቶስ መልካም መዓዛ የመሆን ታላቅ ጥሪን ከመገንዘብ ቁርጠኝነት ሊያዘናጋን አይገባም። የክርስቶስ መዓዛ የሚመነጨው "ከመንፈስ ፍሬዎች" ሲሆን እነዚህም "ፍቅር፣ ደስታ፣ ሰላም፣ ትዕግስት፣ ቸርነት፣ በጎነት፣ እምነት፣ የዋህነት እና ራስን መግዛት" (ገላ 5: 22) የሚሉት ናቸው። እነዚህን ፍሬዎች ለማልማት የምንጥር ከሆነ፣ እኛ ሳናውቀው፣ በዙሪያችን ያለው የክርስቶስን መንፈስ መዓዛ ይሰማናል።