Дублін: першае пасяджэнне Камісіі РКБЕ па справах сям’і і жыцця

Працу новай структуры ўзначаліў яе старшыня – шатландскі арцыбіскуп Лео Уільям Кушлё. Камісія мае на мэце спрыяць распаўсюджванню Евангелля сям’і, гаворыцца ў афіцыйным паведамленні Рады.

Пасяджэнне пачалося з кароткага прадстаўлення членаў структуры – пятнаццаці біскупаў, адказных да душпастырства сем’яў, якія былі дэлегаваны сваімі епіскапатамі. Паведамляецца, што сустрэча дазволіць вызначыць некаторыя напрамкі дзейнасці на бліжэйшыя гады, якія будуць прадстаўлены Прэзідыуму Рады Канферэнцый Біскупаў Еўропы на яе пленарным пасяджэнні, якое 13-16 верасня 2018 г. пройдзе ў Познані.

Рада Канферэнцый Біскупаў Еўропы была заснавана ў 1971 г. У яе склад ўваходзяць кіраўнікі 33 еўрапейскіх епіскапатаў, а таксама арцыбіскупы Люксембурга, Княства Манака, мараніцкі архіепіскап Кіпра, біскуп Кішынёва, Мукачаўскай епархіі і Апостальскі Адміністратар Эстоніі.

Старшынёй Рады з’яўляецца арцыбіскуп Генуі кардынал Анджэла Баньяска. Пасады віцэ-старшынь займаюць: арцыбіскуп Вэстмінстэрскі Вінсэнт Нікалс і арцыбіскуп Познаньскі Станіслаў Гандэцкі. Генеральным сакратаром структуры з’яўляецца мансеньёр Дуартэ да Кунья з Партугаліі. Сакратарыят Рады знаходзіцца ў горадзе Санкт-Гален у Швейцарыі.