Дэкан Калегіі кардыналаў пра “міратворчы” год Пантыфіка
Аляксандр Амяльчэня - Vatican News
У сваім віншавальным слове іерарх адзначыў, што год, які набліжаецца да завяршэння, быў адзначаны драматычнай сітуацыяй не толькі з прычыны працяглай пандэміі COVID-19, але і трагічных войнаў, якія працягваюць выклікаць кровапраліцце і пакуты людзей.
Кардынал падкрэсліў асаблівую занепакоенасць вайной ва Украіне і яе наступствамі ва ўсім свеце. Ён згадаў словы і дзейнасць Святога Айца, накіраваныя на спыненне гэтай “бессэнсоўнай разні”, а таксама яго заклікі да мірных перамоў і дапамогі параненым, бяздомным і многім людзям, якія апынуліся ў бядзе.
Гаворачы аб значэнні года для Рымскай курыі, іерарх падкрэсліў важнасць яе рэформы, абвешчанай Апостальскай канстытуцыяй Praedicate Evangelium, “якая адпавядае патрэбам нашага часу і дапамагае Рымскай курыі лепш выконваць вялікія задачы, якія заключаюцца ў служэнні першынству Папы і служэнні біскупам і Касцёлу ў гэты перыяд гісторыі”.
Ён таксама звярнуў увагу на прысутнасць на розных важных пасадах у ватыканскіх структурах усё большай колькасці свецкіх мужчын і жанчын. На яго думку, рэформа характарызуецца місійным духам і прыхільнасцю да евангелізацыі.
Дэкан Калегіі кардыналаў адзначыў, што за гэты год Святы Айцец, нягледзячы на цяжкасці пры хадзе, здзейсніў чатыры апостальскія падарожжы на Мальту, у Канаду, Казахстан і Бахрэйн.
“Шаноўны і дарагі Наступнік святога Пятра, мы збіраемся вакол цябе ў еднасці веры, малітвы і сыноўняй любові, віншуючы цябе з Божым Нараджэннем і Новым годам”, - напісаў кардынал Джавані Батыста Рэ.
