Кардынал Фернандэс удзяліў сакру біскупу для былых англікан

Марыя Валодзіна – Vatican News

Заснаваны ў 2011 годзе, згодна з Апостальскай канстытуцыяй Anglicanorum сoetibus, Персанальны ардынарыят Маці Божай Уолсінгемскай з'яўляецца дыяцэзіяльнай структурай для былых англікан, якія перайшлі ў Каталіцкі Касцёл. За гэты час да яго далучылася прыкладна пяцьдзясят супольнасцей па ўсёй Вялікабрытаніі. Біскуп Уолер, які да перахода ў Касцёл быў англіканскім святаром, стаў першым біскупам гэтага ардынарыяту.

Біскупскае пасвячэнне ўзначаліў прэфект Дыкастэрыі веравучэння, кардынал Віктар Мануэль Фернандэс. Акрамя яго, у цырымоніі прынялі ўдзел: арцыбіскуп Вестмінстэрскі, кардынал Вінцэнт Нікалс, біскуп Персанальнага ардынарыяту катэдры святога Пятра ў ЗША і Канадзе Стывен Лопес, Апостальскі адміністратар персанальнага ардынарыяту Маці Божай Паўднёвага Крыжа ў Аўстраліі біскуп Энтані Рандаца.

У сваёй гаміліі кардынал Фернандэс адзначыў, што структура ардынарыяту дазваляе англіканам, якія ўступаюць камунію з Каталіцкім Касцёлам, захоўваць сваю самабытную “спадчыну пабожнасці і звычаяў, уласцівых англіканскай супольнасці”. Спасылаючыся на Апостальскую канстытуцыю Anglicanorum сoetibus, кардынал адзначыў, што ардынарыяту рэкамендуецца разглядаць станоўчыя аспекты англіканскай традыцыі як каштоўны дар і скарб, якім можна падзяліцца.

Кардынал Фернандэс падкрэсліў важнасць супрацоўніцтва ардынарыяту з мясцовымі дыяцэзіямі для ўмацавання адзінства і духоўнага росту. Ён заклікаў прысутных "расці ў духу дыялогу і абмену досведам, у тым ліку ў дасягненні пастырскіх мэтаў у святле таго, што прапануе Папа Францішак".

Іерарх прывёў у прыклад англійскіх святых, у прыватнасці святога Джона Генры Ньюмана, заахвоціўшы новага біскупа клапаціцца аб даручаным яму статку з адданасцю і любоўю.