Усходнія каталіцкія іерархі шукаюць адказы на выклікі эпохі
Аляксандр Амяльчэня - Vatican News
На працягу чатырох дзён больш за 60 прадстаўнікоў духавенства з розных краін абмяркоўвалі важныя пытанні, якія хвалююць сучасную Царкву.
Галоўнымі тэмамі сустрэчы сталі ўзаемаадносіны паміж епіскапамі і святарамі ў духу братэрства, набліжэнне заключнай сесіі Сінода Біскупаў па сінадальнасці, а таксама вострыя праблемы сучаснасці – вайна ва Украіне і міграцыйны крызіс.
Удзельнікі падкрэслілі важнасць адзінства і салідарнасці паміж Цэрквамі ў сённяшнім свеце, поўным выклікаў і супярэчнасцей. Яны адзначылі, што ў наш час, калі вера і хрысціянскія каштоўнасці часта сутыкаюцца з абыякавасцю ці павярхоўным стаўленнем, асабліва важна даваць пераканаўчае сведчанне Евангелля, поўнае любові і надзеі.
Іерархі таксама абмеркавалі сучасныя выклікі ў падрыхтоўцы духавенства, падкрэсліўшы неабходнасць захавання цэнтральнай ролі малітвы, сувязі са Словам Божым і духоўнага росту ў жыцці святара.
Асаблівую ўвагу ўдзельнікі сустрэчы звярнулі на сітуацыю ва Украіне. Яны выказалі сваю салідарнасць з народам, які пакутуе ад вайны, і заклікалі да праўды і справядлівасці.
Наступная сустрэча каталіцкіх епіскапаў усходніх абрадаў Еўропы запланавана на верасень 2025 года ў Вене.
