ПАПА

Францішак нагадаў пра неад’емнасць чалавечай годнасці

Калі не станем клапаціцца адзін пра аднаго, пачынаючы з тых, каго пандэмія закранула найбольш моцна, не зможам вылечыць свет, перасцярог Францішак 12 жніўня 2020 г., падчас агульнай аўдыенцыі ў Ватыкане.

Пантыфік працягнуў цыкл катэхез, прысвечаных тэме пандэміі і разважанню пра свет у паслякрызісны перыяд.

Папа заўважыў, што “каронавірус – не адзіная хвароба, з якой трэба змагацца”, бо “пандэмія выявіла больш шырокія сацыяльныя паталогіі”, сярод якіх – “скажонае бачанне чалавека”, стаўленне да яго як да рэчы, якой можна пакарыстацца, каб потым выкінуць, ігнараванне яго годнасці і сацыяльнай прыроды.

“Такі погляд асляпляе і правакуе індывідуалістычную і агрэсіўную культуру адчужэння, якая ператварае чалавечую асобу ў спажывецкі тавар”

, - сцвердзіў Святы Айцец.

Ён нагадаў, што Бог надаў чалавеку непаўторную годнасць і запрасіў да адзінства з Ім і нашымі братамі і сёстрамі, надзяліў здольнасцю даваць і абараняць жыццё, апрацоўваць зямлю і клапаціцца пра яе. Таксама і Езус вучыць служыць і ахвяраваць жыццё дзеля іншых (гл. Мц 20,20-28).

Неад’емнасць чалавечай годнасці, “створанай па вобразе Бога”, падкрэсліў Другі Ватыканскі Сабор, а выразам гэтага прынцыпу ў сучаснай культуры стала Усеагульная дэкларацыя правоў чалавека.

“Гэта абноўленае ўсведамленне годнасці кожнага чалавека мае сур’ёзныя сацыяльныя, эканамічныя і палітычныя наступствы”

, - адзначыў Папа.

Успрыняцце іншага чалавека і ўсяго стварэння як “дару Айцоўскай любові”, выклікае праяўленне “ўвагі, клопату і захаплення”; стаўленне да бліжняга як да брата становіцца крыніцай “спагады і эмпатыі”; сузіранне наваколля ў святле веры дапамагае развіваць уласную крэатыўнасць і энтузіязм, “каб вырашаць драматычныя сітуацыі гісторыі”. Чалавек пачынае ўспрымаць і развіваць свае здольнасці ў ключы адказнасці, як Божыя дары, прызначаныя на служэнне чалавецтву і стварэнню, - патлумачыў Францішак.

“У той час як мы працуем дзеля лячэння вірусу, які закранае ўсіх без выключэння, вера кліча нас да сур’ёзных і актыўных намаганняў для супрацьстаяння абыякавасці перад абліччам парушэнняў годнасці чалавека”

, - сцвердзіў Папа.

Ён нагадаў, што “вера заўсёды патрабуе нашага дазволу на тое, каб быць вылечанымі і вызваленымі з нашага індывідуалізму, асабістага і калектыўнага”.

Святы Айцец пажадаў, каб Пан “вярнуў нам зрок”, з тым “каб мы ўбачылі, што значыць быць членамі чалавечай сям’і”, і “каб гэтае бачанне ўвасобілася ў канкрэтных учынках спагадлівасці і павагі да кожнага чалавека, клопату і абароны нашага агульнага дома”.