ПАПА

Папскае пасланне на Сусветны дзень хворых

Грамадства застаецца гуманным, калі клапоціцца пра слабых і тых, хто пакутуе, і робіць гэта эфектыўна, ажыўленае братэрскай любоўю, - адзначыў Папа ў пасланні на XXIX Сусветны дзень хворых.

Яго тэма: “Адзін у вас Настаўнік, а ўсе вы – браты”. Яна ўзята з фрагмента Евангелля св. Мацвея, у якім Езус крытыкуе крывадушнасць тых, хто гаворыць, але не робіць (Мц 23, 1-12), і перасцерагае ад небяспекі ўпасці ў пакланенне самому сабе. У ім Збаўца таксама прапануе ўзор паводзін, цалкам супрацьлеглы крывадушнасці. Ён запрашае спыніцца, выслухаць, усталяваць прамыя і асабістыя адносіны з іншым чалавекам, адчуць суперажыванне і эмоцыі, удзельнічаць у яго пакутах і клапаціцца пра яго.

Святы Айцец заўважыў, што перажыванне хваробы прымушае нас адчуваць сваю бездапаможнасць і адначасова прыроджаную патрэбу ў іншым чалавеку. Мы ўсведамляем сваю залежнасць ад Бога і адчуваем, што не маем канчатковага ўплыву на сваё здароўе. Хвароба ўздымае пытанне пра сэнс жыцця, якое ў веры скіравана да Бога і мае на мэце пошук новага разумення таямніцы існавання. Адказу на гэта пытанне нельга знайсці адразу.

Францішак адзначыў, што хвароба заўсёды мае пэўны твар, і ён не адзін: гэта твар кожнага хворага і кожнай хворай, у тым ліку тых, хто адчувае непавагу, выключэнне, ахвяр сацыяльнай несправядлівасці, якім адмаўляюць у іх асноўных правах.

Спасылаючыся на крызіс, выкліканы пандэміяй, Пантыфік заявіў, што, з аднаго боку, ён выявіў недасканаласць сістэмы аховы здароўя, асабліва ў сферы догляду за пажылымі людзьмі і роўнага доступу да дапамогі, а з іншага боку, падкрэсліў адданасць і шчодрасць медыцынскіх работнікаў, валанцёраў і духавенства, якія дзякуючы свайму прафесіяналізму, самаадданасці, пачуццю адказнасці і любові да бліжняга дапамагалі, выхоўвалі, суцяшалі і служылі хворым і іх сем’ям.

Святы Айцец нагадаў пра важнасць самых глыбокіх чалавечых пачуццяў у клопаце пра хворых. Ён звярнуў увагу на блізкасць як на каштоўны бальзам, які дае падтрымку і суцяшэнне тым, хто пакутуе. Як хрысціяне, мы адчуваем блізкасць як выраз любові да Хрыста, Добрага Самараніна, Які са спачуваннем зблізіўся з усімі, параненымі грахом.

Папа таксама падкрэсліў важнасць братэрскай салідарнасці, якая выражаецца ў служэнні і можа прымаць розныя формы, і ўсе яны накіраваны на падтрымку бліжняга.

Ён заўважыў, што для поспеху лячэбнага працэсу важны аспект чалавечых адносін, дзякуючы чаму можна мець цэласны падыход да пацыента. Належная ацэнка гэтага аспекту таксама дапамагае ўрачам, медсёстрам, спецыялістам і валанцёрам клапаціцца пра тых, хто пакутуе, і суправаджаць іх у працэсе выздараўлення дзякуючы чалавечым адносінам, заснаваным на даверы.

Папа падкрэсліў, што адносіны да хворага чалавека знаходзяць невычэрпную крыніцу матывацыі і сілы ў любові Хрыста, што дэманструе тысячагадовае сведчанне мужчын і жанчын, якія сталі святымі, служачы хворым. “З таямніцы смерці і ўваскрасення Хрыста выцякае любоў, якая можа надаць поўны сэнс як сітуацыі пацыента, так і таго, хто клапоціцца пра яго”, - перакананы Францішак.

Сусветны дзень хворых быў заснаваны ў 1992 г. св. Янам Паўлам ІІ. Ён адзначаецца 11 лютага, у літургічны ўспамін Маці Божай Лурдскай.