Папа: візіт у Ірак дазволіў дакрануцца да святога Божага народу
8 сакавіка 2021 г., падчас амаль пяцігадзіннага авіяпералёту з Багдада ў Рым, Францішак паразмаўляў з журналістамі, якія суправаджалі яго ў гістарычным падарожжы на Блізкі Усход.
У ходзе размовы Пантыфік выказаў спадзяванне, што яго сустрэча з Вярхоўным аяталой Саідам Алі Эль-Хусаймі Аль-Сістані, духоўным лідарам іракскіх шыітаў, стане пачаткам шляху сапраўднага братэрства і новым этапам міжрэлігійнага дыялогу, першым крокам якога стала падпісанне 4 лютага 2019 г. у Абу-Дабі “Дэкларацыі аб братэрстве паміж людзьмі, міры ў свеце і агульным суіснаванні”.
Францішак прызнаўся, што яго вельмі кранулі словы Аль-Сістані: “Людзі з’яўляюцца або братамі на падставе рэлігіі, або роўнымі на падставе стварэння”. “Роўнасць ляжыць у братэрстве”, - сцвердзіў ён.
Пантыфік прызнаўся, што ўспрымае сустрэчу з Вярхоўным аяталой Аль-Сістані ў якасці “ўніверсальнага паслання”, запрашэння да братэрства, да ўмення бачыць у сваім атачэнні людзей, паслядоўных у перажыванні веры і вечных каштоўнасцей.
Святы Айцец таксама пацвердзіў свой намер у будучым здзейсніць візіт у Ліван. Краіна, па яго словах, перажывае “жыццёвы крызіс” і яшчэ не здолела прыйсці да поўнага прымірэння ва ўмовах той разнастайнасці, якой вылучаецца. У той жа час, падкрэсліў Святы Айцец, гэта краіна, надзвычай гасціная ў адносінах да бежанцаў.
Запланаваны на гэты год яшчэ адзін візіт, прызнаўся Папа, будзе звязаны з яго ўдзелам у завяршальнай св. Імшы Эўхарыстычнага кангрэса ў Будапешце. Магчыма, Пантыфік адправіцца з пілігрымкай у суседнюю з Венгрыяй Славакію.
Папа выказаў заклапочанасць міграцыйнымі працэсамі, якія вельмі часта ўспрымаюцца краінамі свету як “умяшанне”. На думку Францішка, “патрэбны тэрміновыя меры па абароне права на міграцыю”. Ён падзякаваў тым краінам, якія адкрыта і гасцінна прымаюць на сваёй тэрыторыі бежанцаў і мігрантаў.
Францішак расказаў, што пасля вымушаных месяцаў локдаўна, калі ён адчуваў сябе “зняволеным”, падарожжа ў Ірак “ажывіла” яго, таму што нарэшце дазволіла ізноў “дакрануцца да Касцёла”, “да святога Божага народу”.
“Кантакт з народам ратуе нас, дапамагае нам. Мы даём Эўхарыстыю, прапаведаванне, сваю паслугу. Аднак людзі даюць нам пачуццё прыналежнасці. Давайце не забываць пра гэтую прыналежнасць да народа Божага”, - сказаў Папа.
