Інстытут рэлігійных спраў падсумаваў бюджэт за 2020 г.
Аляксандр Панчанка – Vatican News
У адпаведнасці са Статутам, Назіральная рада накіравала дакумент Камісіі кардыналаў, “падкрэсліваючы надзейнасць і высокую якасць фінансавых дадзеных Інстытута (узровень актываў і ліквіднасці) і іх адпаведнасць самым высокім міжнародным стандартам”.
Згодна з указаннямі папы Францішка Камісія кардыналаў ухваліла размеркаванне прыбытку, накіраваўшы 75% на патрэбы Святога Айца і канкрэтных устаноў, а астатнія 25% на павелічэнне ўзроўню актываў у адпаведнасці з пастаянным развіццём Інстытута і доўгатэрміновай місіяй служэння Каталіцкага Касцёла.
“У 2020 г., асабліва цяжкім для сусветнай эканоміцы, Інстытут працягваў аказваць якасныя фінансавыя паслугі Дзяржаве Ватыкан і Каталіцкаму Касцёлу, які прысутнічае ва ўсім свеце. Акрамя таго, Інстытут надалей прыкладае намаганні па забеспячэнні поўнага і пастаяннага выканання сацыяльнага вучэння Каталіцкага Касцёла і яго прынцыпаў ва ўсіх відах аператыўнай дзейнасці, у прыватнасці, у працэсах кіравання і інвестыцыйнай палітыцы, што тычыцца ўласных і кліенцкіх актываў”, - гаворыцца ў паведамленні Залы Друку.
Ключавыя фінансавыя дадзеныя за 2020 г., выражаныя ў еўра, выглядаюць наступным чынам: 5 млрд дэпазітаў кліентаў (5,1 млрд у 2019 г.), з якіх 3,3 млрд адносяцца да кіраваных актываў або захоўваюцца ў каштоўных паперах; чысты прыбытак у памеры 36,4 млн (38 млн у 2019 г.), што з’яўляецца вынікам інвестыцыйнага працэсу, заснаванага на каталіцкай этыцы; капітал у памеры 645,9 млн па стане на 31 снежня 2020 г. (630 млн на 31 снежня 2019 г.) і пасля размеркавання прыбытку.
На працягу 2020 г. Інстытут рэлігійных спраў працягваў умацоўваць кіраўнічую каманду і павялічваць інвестыцыі ў ІТ, уключаючы праграму развіцця для павышэння ўстойлівасці тэхналагічнай інфраструктуры і зніжэння рызык, звязаных з выкарыстаннем камп’ютарных тэхналогій.
Назіральную раду Інстытута рэлігійных спраў узначальвае француз Жан-Батыст Дувіль дэ Франсю. Камісія кардыналаў складаецца з: старшыні – кардынала Сантаса Абрыль-і-Кастэльё; арцыбіскупа Венскага, кардынала Крыстафа Шонборна; прэфекта Кангрэгацыі Евангелізацыі Народаў, кардынала Луіса Антоніа Тагле; Апостальскага элемазінарыя, кардынала Конрада Краеўскага; арцыбіскупа Аквільскага і члена Папскай камісіі па справах Дзяржавы Ватыкан, кардынала Джузэпэ Пэтрокі.
