Дзяржсакратар: бамбардзіроўка дзіцячага шпіталя непрымальная

Аляксандр Панчанка – Vatican News

Бамбардзіроўка педыятрычнага шпіталя з’яўляецца непрымальнай і беспрычыннай, - сказаў Дзяржсакратар Яго Святасці Папы падчас сустрэчы з журналістамі, каментуючы паведамленне пра расійскі авіяцыйны ўдар па бальніцы з радзільным і педыятрычным аддзяленнем у Марыупалі.  

Дзяржсакратар заўважыў, што прастора для перамоў з’яўляецца абмежаванай, аднак выказаў спадзяванне на тое, што ўсё ж атрымаецца прыйсці да пазіцыі, дасягнутай шляхам перамоў.

Спасылаючыся на тэлефонную размову з Міністрам замежных спраў Расіі Сяргеем Лаўровым, кардынал Паралін прызнаўся, што яна не прынесла ніякіх гарантый, у прыватнасці не было пачута запэўніванняў адносна гуманітарных калідораў.

Іерарх падкрэсліў, што Апостальская Сталіца цалкам гатова зрабіць крокі на дыпламатычным фронце, каб знайсці рашэнне, здольнае пакласці канец вайне. Ён заклікаў спыніць канфлікт і ўмацаваць перамовы, выказваючы гатоўнасць да пасярэдніцтва, калі яно зможа дапамагчы, але патрэбна, каб надышоў адпаведны зварот.

Прысутнасць ва Украіне двух кардыналаў – Апостальскага элемазінарыя Конрада Краеўскага і часовага прэфекта Дыкастэрыі па служэнні інтэгральнаму развіццю чалавека Майкла Чэрны – Дзяржсакратар назваў знакам таго, што Папа хоча зрабіць унёсак не толькі да дыпламатычным і духоўным узроўні, але таксама на гуманітарным.

Каментуючы нядаўнія словы Патрыярха Маскоўскага Кірыла, кардынал Паралін заўважыў, што яны “не спрыяюць і не садзейнічаюць згодзе, а хутчэй нясуць рызыку далейшага распальвання настрояў і эскалацыі, што не дапамагае вырашэнню крызіса мірным шляхам”.