Пантыфік заклікаў канадцаў захоўваць лучнасць паміж пакаленнямі
Аляксандр Панчанка - Vatican News
У гаміліі Францішак спаслаўся на літургічны ўспамін святых Яўхіма і Ганны, дзядулі і бабулі Езуса, у доме якіх Ён напоўніцу адчуў іх блізкасць, пяшчоту і мудрасць. “Давайце таксама і мы падумаем пра нашых дзядуль і бабуль“, - сказаў Папа, заклікаючы паразважаць над тым, што кожны чалавек з’яўляецца “дзіцём гісторыі, якую трэба захоўваць“, і “майстрам гісторыі, якую трэба будаваць“.
Нашы карані, любоў сямейнага асяроддзя “з’яўляюцца часткай унікальнай гісторыі, якая нам папярэднічала і якая стварыла нас”. “Мы не выбралі яе самі, а атрымалі ў дар”, - дадаў Святы Айцец, падкрэсліваючы, што ў гэту каштоўную спадчыну ўваходзяць доблесць, аўтарытэт, інтэлект, творчасць нашых продкаў, а таксама іх справядлівасць, вернасць Богу і Яго волі.
“Мы знаходзімся тут дзякуючы бацькам, але таксама дзякуючы бабулям і дзядулям”, праз якіх “мы даведаліся, што дабрыня, пяшчота і мудрасць – гэта моцныя карані чалавецтва”. “У доме бабуль і дзядуль многія з нас дыхалі водарам Евангелля, сілай веры, якая мае пах дому. Дзякуючы ім мы адкрылі для сябе сямейную, хатнюю веру”, - сцвердзіў Пантыфік, нагадваючы, што вера павінна перадавацца “на дыялекце”, праз ласкавасць і падтрымку, клопат і блізкасць, а не праз абмежаванні ці пазбаўленне ўнутранай свабоды. Ён заклікаў хрысціян вучыцца ніколі не прыгнятаць чужое сумленне, не пазбаўляць свабоды людзей, а ў першую чаргу заўсёды любіць і шанаваць тых, хто быў перад намі, і перадаў нам каштоўныя скарбы гісторыі.
Прымаючы важныя рашэнні, мы павінны задавацца пытаннем, што зрабілі б нашыя знаёмыя мудрыя старцы, што параілі б нашы дзядулі і бабулі, - прапанаваў Святы Айцец. Ён заклікаў клапатліва ставіцца да атрыманай спадчыны, памятаць добрыя настаўленні старэйшых, размаўляць з імі, знаходзіць час, каб слухаць іх, а таксама параіў мець у дамах асаблівае, годнае месца – “маленькую сямейную святыню” з памяткамі, выявамі, Бібліяй ці ружанцам нашых продкаў. Маліцца разам з імі і ў адзінстве з імі, прысвячаць час успамінам, захоўваць іх спадчыну, клапаціцца пра карані – менавіта “так расце дрэва і ствараецца будучыня”, - запэўніў Францішак.
Папа падкрэсліў таксама, што кожны чалавек з’яўляецца “майстрам гісторыі, якую трэба будаваць”. “Продкі, ад якіх паходзім, старыя, якія марылі, спадзяваліся і ахвяравалі сабой дзеля нас, задаюць нам фундаментальнае пытанне: якое грамадства вы жадаеце пабудаваць? Мы атрымалі шмат з рух тых, хто нам папярэднічаў: што хочам перадаць нашым нашчадкам? Жывую веру ці “ружовую вадзіцу”? Грамадства асабістай выгады ці братэрства? Мірны свет ці вайну? Знішчанае стварэнне ці гасцінны дом?”, - спытаў Святы Айцец.
Францішак нагадаў, што жыццядайны рух ідзе ад каранёў да галінаў, а сапраўдная традыцыя выяўляецца ў вертыкальным вымярэнні – знізу ўверх. Таму, абапіраючыся на свае карані, мы павінны прыносіць плёны і сеяць новыя зерні ў гісторыі.
“Няхай святыя Яўхім і Ганна заступаюцца за нас: няхай дапамагаюць нам клапатліва захоўваць гісторыю, якая стварыла нас, і будаваць жыццядайную гісторыю. Няхай яны нагадваюць нам пра духоўную каштоўнасць шанавання бабуль, дзядуль і старыкоў, няхай вучаць цаніць іх прысутнасць, каб будаваць лепшую будучыню, у якой пажылых не спісваюць ва ўтыль як “ужо непатрэбных”; будучыню, дзе не ацэньваюць людзей толькі на падставе таго, колькі яны могуць вырабіць; будучыню, не абыякавую да таго, хто зараз, у сталым узросце, патрабуе больш часу, слухання і ўвагі; будучыню, у якой не паўтараецца гісторыя насілля і маргіналізацыі, якая прымусіла пакутаваць карэнныя народы. Такая будучыя стане магчымай, калі з Божай дапамогай мы не разарвём сувязь з тымі, што ішоў перад намі, і калі будзем умацоўваць дыялог з тымі, хто прыйдзе пасля нас: маладымі і старыкамі, бабулямі і дзядулямі, унукамі – усе разам. Будзем жа ісці наперад і марыць разам”, - заклікаў Папа на заканчэнне гаміліі.
