Ватыкан: другая сучасная скульптура на плошчы святога Пятра

Аляксандр Амяльчэня - Vatican News

Мастацкі твор называецца Sheltering (Прытулак). Гэта выява бяздомнага ў натуральную велічыню, якога накрывае сваімі крыламі голуб. Нагодай для ўсталявання стаў шосты Сусветны дзень бедных, які ў Касцёле па ініцыятыве Францішка адзначаць 13 лістапада 2022 года.

Стваральнік скульптуры – канадзец Цімаці Шмальц. Раней ён выканаў іншую бронзава-гліняную кампазіцыю Angels Unwares, якую таксама размясцілі на плошчы святога Пятра. Гэта выявы бежанцаў рознага ўзросту і паходжання, якія тоўпяцца ў лодцы пад абаронай анёльскіх крылаў. Гэты твор таксама блаславіў Францішак.