Пантыфік брацтвам: не замыкацца ў сабе і не тужыць па мінулым
Аляксандр Панчанка - Vatican News
16 студзеня 2023 года Францішак прыняў на аўдыенцыі ў Ватыкане прадстаўнікоў Канфедэрацыі брацтваў Рымскай дыяцэзіі. Ён нагадаў, што свецкія пакліканы спрыяць асвячэнню свету, дзейнічаючы ўнутры яго на падабенства закваскі. Пантыфік заклікаў сваіх гасцей быць заўсёды паслухмянымі Святому Духу і асаблівым чынам адзначыў каштоўнасць народнай пабожнасці, захаванню якой спрыяюць брацтвы, у тым ліку з дапамогай правядзення традыцыйных рэлігійных працэсій.
“Няхай багацце і памяць аб вашай гісторыі ніколі не стануць для вас прычынай замкнёнасці ў сабе, настальгічнага святкавання мінулага, закрытасці перад абліччам сучаснасці або песімізму адносна будучыні”, - сказаў Папа, заклікаючы прадстаўнікоў брацтваў заставацца адкрытымі на знакі часу і Божыя сюрпрызы.
На думку Святога Айца шлях каталіцкіх брацтваў павінен быць пазначаны евангелізацыйнасцю, эклезіяльнасцю і місіянерствам: гэта значыць, што неабходна ісці за Хрыстом, ісці разам і абвяшчаць Евангелле.
Пантыфік заклікаў вернікаў паставіць Езуса ў цэнтр свайго існавання, штодзённа звяртацца да Божага слова, прымаць сакрамэнты, весці актыўнае малітоўнае і літургічнае жыццё. Ён падкрэсліў таксама патрэбу ў мужным абнаўленні традыцый брацтваў у еднасці з Касцёлам, каб яны былі даступнымі і зразумелымі ўсім і дапамагалі набліжацца да веры тым, хто знаходзіцца далёка ад яе. Напрыканцы сустрэчы Папа заахвоціў сваіх гасцей быць уважлівымі да новых форм беднасці, якія існуюць у свеце, “з крэатыўнасцю і мужнасцю адказваючы на патрэбы нашага часу”.
