Папа: Вялікі пост – пераход ад рабства эгаізму да свабоды любові
Аляксандр Амяльчэня - Vatican News
24 лютага 2023 года Францішак сустрэўся з прадстаўнікамі каталіцкай дабрачыннай арганізацыі Pro Petri Sede.
“Вы і сёння з’яўляецеся сведкамі шчодрасці і міласэрнасці, што ажыўлялі сэрцы вашых папярэднікаў, якія не баяліся аддаць сваё жыццё дзеля любові да Касцёла. Сёння заклік ахвяраваць сябе з любові да нашых братоў і сясцёр не менш актуальны: многія з іх пакутуюць ад вайны, насілля, выключэння, матэрыяльнай і духоўнай галечы. І важна, што ваша пілігрымка супадае з пачаткам Вялікага посту, спрыяльнага часу, які заклікае нас да навяртання, каб перайсці ад рабства эгаізму да свабоды любові і служэння Богу і нашым братам і сёстрам”, - звярнуўся Папа.
Святы Айцец выказаў дабрачынцам “удзячнасць за верную падтрымку яго служэння як Наступніка Пятра”.
Асацыяцыя Pro Petri Sede дзейнічае ў Бельгіі, Нідэрландах і Люксембургу. Яе галоўная мэта – падтрымка ініцыятыў і намаганняў Святога Айца. Па даўняй традыцыі, штогадова яе чальцы здзяйсняюць пілігрымку да магілы святога Пятра. Іх рэгулярна прымае на аўдыенцыі Пантыфік.
