Францішак правёў тэлефоную размову з Прэзідэнтам Бразіліі
Аляксандр Панчанка – Vatican News
Бразільскі лідар падзякаваў Папу за намаганні, накіраваныя на пошук міру ва Украіне, а таксама распавёў яму пра перамовы з лідарамі іншых краін на гэту тэму, выказаўшы свой смутак з прычыны эскалацыі канфлікту, - гаворыцца ў афіцыйным паведамленні бразільскага боку. Лула да Сілва нядаўна выступіў з прапановай стварыць групу краін, сярод якіх Бразілія, для пасрэдніцтва ў мірным працэсе.
Палітык падзякаваў Святому Айцу за барацьбу з беднасцю і намаганні Каталіцкага Касцёла ў Бразіліі, накіраваныя на ахову Амазоніі ад сіл, якія спрабуюць знішчыць гэты рэгіён, называны “зялёнымі лёгкімі” планеты. Лула да Сілва выказаў удзячнасць Францішку таксама за памяць пра Бразілію і салідарнасць з ёй на працягу апошніх гадоў.
Прэзідэнт падзяляўся інфармацыяй пра барацьбу з беднасцю і голадам у Бразіліі, а таксама запрасіў Папу наведаць гэту краіну. Паведамляецца, што Святы Айцец узяў пад увагу гэта запрашэнне; ён наведваў Бразілію дзесяць гадоў таму з нагоды Сусветных дзён моладзі, што праходзілі летам 2013 года ў Рыа-дэ-Жанейра.
У бліжэйшыя месяцы Лула да Сілва адведае Ватыкан, дзе сустрэнецца з Пантыфікам. Яго папярэднія візіты праходзілі ў 2009 годзе – тады ён сустракаўся з Бэнэдыктам XVI – і ў 2020 годзе, калі яго прымаў Францішак. Падчас папярэдняй аўдыенцыі бакамі абмяркоўваліся пытанні, звязаныя з дэмакратыяй, навакольным асяроддзем, няроўнасцю і эканомікай, уважлівай да бедных і моладзі.
