Святы Айцец прыняў групу маладых пілігрымаў з Украіны
Аляксандр Панчанка – Vatican News
Група з пятнаццаці маладых пілігрымаў з Украіны адведала Святога Айца ў Апостальскай нунцыятуры ў партугальскай сталіцы, дзе ён спыніўся на час свайго падарожжа. Выслухаўшы кранальныя гісторыі маладых людзей, Папа скіраваў да іх некалькі слоў, “выказваючы сваю поўную смутку і малітвы блізкасць”. Сустрэча доўжылася каля 30-ці хвілін. Напрыканцы Францішак і моладзь разам памаліліся Ойча наш, “звяртаючыся думкамі да змучанай Украіны”.
Пантыфік сустрэўся таксама з чатырма сваякамі 62-гадовай французскай катэхеткі, якая прыехала ў Лісабон на Сусветныя дні моладзі і загінула некалькі дзён таму ў выніку няшчаснага выпадку. Яны прысутнічалі на святой Імшы з удзелам Папы, якая прайшла у капліцы дыпламатычнага прадстаўніцтва Апостальскай Сталіцы ў Партугаліі.
