Regina caeli: слухаць Духа Святога і быць пакорлівымі Яго голасу
Аляксандр Амяльчэня - Vatican News
Езус у Евангеллі абяцае нам, што Дух Святы раскажа нам “усё, што пачуў”, - звярнуў увагу Францішак. “Гэта словы, якія выказваюць цудоўныя пачуцці, такія як любоў, удзячнасць, давер, міласэрнасць. Словы, якія дазваляюць нам пазнаць прыгожыя, ясныя, канкрэтныя і трывалыя адносіны, якімі з’яўляецца вечная любоў Бога. Словы, якія Айцец і Сын адрасуюць адно аднаму. Гэта перамяняльныя словы любові, якія Дух Святы паўтарае ў нас і якія прыносяць нам карысць, калі мы іх слухаем, таму што прымушаюць нараджацца і расці ў нашых сэрцах тыя ж пачуцці і тыя ж намеры”, - сказаў Пантыфік. Таму важна, адзначыў ён, каб мы кожны дзень сілкаваліся імі, чытаючы фрагмент Евангелля, выкарыстоўваючы кароткія зручныя моманты на працягу дня.
Папа нагадаў словы паэта, ксяндза Клементэ Марыя Рэбора, які, кажучы пра сваё навяртанне, пісаў: “Гэтае Слова заглушыла маю балбатню!” “Неабходна слухаць слова, каб заглушыць плёткі. Такім чынам мы можам вызваліць у сабе месца для голасу Духа Святога. А таксама падчас адарацыі і малітвы, асабліва простай і ціхай. І, нарэшце, кажучы адзін аднаму добрыя словы, становячыся адзін для аднаго рэхам салодкага голасу Суцяшыцеля”, - параіў Святы Айцец.
Ён падкрэсліў, што “чытаць Евангелле і разважаць над ім, маліцца ў цішыні, прамаўляць добрыя словы – гэта не складаныя рэчы – мы ўсе можам гэта рабіць”. Ён заклікаў вернікаў слухаць Духа Святога і быць пакорлівымі Яго голасу.
