Анёл Панскі: падтрымліваць адзін аднаго на шляху да Езуса
Марыя Валодзіна - Vatican News
Францішак нагадаў аб тым, што святога Пятра часта адлюстроўваюць з двума вялікімі ключамі ў руцэ, таму што Езус сказаў: "Я дам табе ключы Валадарства Нябеснага" (Мц 16,19). Гэтыя ключы сімвалізуюць служэнне ўлады, якое Езус даў яму, каб служыў Касцёлу. Бо ўлада – гэта служэнне, а ўлада, якая не з'яўляецца служэннем – гэта дыктатура, заўважыў Папа.
“Але трэба ўпэўніцца, што мы добра разумеем сэнс усяго гэтага. Ключы Пятра – гэта ключы ад Валадарства, якое Езус апісвае не як сейф ці нейкае браніраванае памяшканне, а іншымі вобразамі: як маленькае зярнятка, каштоўная перліна, схаваны скарб, закваска (пар. Мц 13, 1-33). Як штосьці каштоўнае і багатае, але ў той жа час маленькае і непрыкметнае. Каб дасягнуць яго, не трэба запускаць механізмы і замкі, а развіваць такія цноты, як цярпенне, пільнасць, сталасць, пакора, служэнне”, - сказаў Францішак.
Такім чынам, місія, даручаная Пятру Езусам, заключаецца не ў тым, каб зачыніць дзверы дома, дазваляючы ўвайсці туды толькі некаторым абраным гасцям, а ў тым, каб дапамагчы кожнаму знайсці шлях да ўваходу, у вернасці Евангеллю Езуса.
“Пётр будзе рабіць так усё жыццё, да самай пакутніцкай смерці, першым выпрабаваўшы на сабе, не без цяжкасцяў і падзенняў, радасць і свабоду, якія нараджаюцца ад сустрэчы з Панам. Каб расчыніць дзверы Езусу, ён павінен быў навярнуцца першым, зразумець, што ўлада – гэта служэнне, і гэта было нялёгка. Падумайце: неўзабаве пасля таго, як ён сказаў Езусу: "Ты – Хрыстус", Настаўнік быў вымушаны папракнуць яго за тое, што адмаўляўся прыняць прароцтва пра Яго муку і крыжовую смерць (пар. Мц 16, 21-23)”, - нагадаў Францішак.
Пётр атрымаў ключы ад Валадарства Нябеснага не таму, што быў дасканалы, ён – грэшнік, а таму, што быў сціплы і сумленны, і Айцец адарыў яго чыстай верай (пар. Мц 16, 17). Таму, спадзеючыся на ласку Божую, ён мог падтрымліваць і ўмацоўваць і сваіх братоў (пар. Лк 22, 32).
Папа заклікаў спытаць сябе: Ці культывую я жаданне ўвайсці, з Божай ласкай, у Яго Валадарства і быць, з Яго дапамогай, гасцінным вартаўніком для іншых? Дзеля гэтага, ці дазваляю я Езусу і Яго Духу, які жыве ўва мне, "шліфаваць", змякчаць і ляпіць сябе?
“Няхай Марыя, уладарка апосталаў, і святыя Пётр і Павел сваёй малітвай дапамогуць нам суправаджаць і падтрымліваць адзін аднаго на шляху да Пана Езуса”, - заклікаў Францішак.
