Францішак правёў шэраг сустрэч у Ватыкане
Аляксандр Амяльчэня - Vatican News
Дзень пачаўся каля 8.00 сустрэчай кардыналам Віктарам Мануэлем Фернандэсам, прэфектам Дыкастэрыі веравучэння, а затым з кардыналам Клаўдыё Гуджэроці, прэфектам Дыкастэрыі па справах Усходніх Цэркваў. Праз 15 хвілін Папа прыняў кардынала Жан-Марка Авеліна, арцыбіскупа французскага Марселя.
Значным момантам дня стала прадстаўленне даверчых грамат новым паслом Славацкай Рэспублікі Юраем Прыпутэнам. Гэта традыцыйная цырымонія, якая афіцыйна пацвярджае прызначэнне новага пасла і ўмацоўвае дыпламатычныя сувязі паміж Святым Пасадам і краінай.
Каля 9.00 Святы Айцец сустрэўся з албанскім іерархам Ар'янам Додаем, арцыбіскупам Ціраны-Дурэса. Таксама ў праграме была аўдыенцыя для кардынала Джанфранка Гірланды.
Сустрэчы падкрэсліваюць шырокі спектр адказнасці Папы Францішка, які ахоплівае як унутраныя справы Касцёла, так і міжнародныя адносіны. Яны таксама адлюстроўваюць яго ўвагу да розных рэгіёнаў свету і імкненне падтрымліваць дыялог з прадстаўнікамі розных узроўняў касцельнай іерархіі і дзяржаўнымі дзеячамі.
