Папа: Езус – хлеб жывы, які суцяшае прагу надзеі, праўды і збаўлення
Аляксандр Панчанка - Vatican News
Падчас сустрэчы з вернікамі на малітве Анёл Панскі, якая прайшла 18 жніўня 2024 года на плошчы святога Пятра ў Ватыкане, Францішак пракаментаваў літургічны евангельскі ўрывак, у якім Езус з прастатой сцвярджае: “Я хлеб жывы, які сышоў з неба” (Ян 6, 51).
“На вачах у людзей Божы Сын атаясамлівае сябе з самай звычайнай і штодзённай ежай. Некаторыя слухачы пачыналі спрачацца: “Як Ён можа даць нам есці сваё цела?”. Мы таксама задаёмся гэтым пытаннем сёння, але з здзіўленнем і ўдзячнасцю”, - сказаў Святы Айцец, прапануючы задумацца над гэтымі двума аспектамі.
У першую чаргу – здзіўленне, бо словы Езуса заўсёды здзіўляюць нас. “Хлеб з неба – гэта дар, які пераўзыходзіць усе чаканні. Той, хто не разумее стылю Езуса, застаецца недаверлівым: здаецца немагчыма, нават не па-людску есці цела іншага чалавека. Аднак, цела і кроў, гэта чалавечнасць Езуса, гэта Яго жыццё, ахвяраванае ў якасці пасілку для нашага жыцця”, - патлумачыў Францішак.
“І гэта вядзе нас да другога аспекту: удзячнасці, бо мы распазнаём Езуса там, дзе Ён становіцца прысутным для нас і разам з намі: “Хто есць Маё цела і п’е Маю кроў, ува Мне ёсць, а Я – у ім” (Ян 6,56). Хрыстус, сапраўдны чалавек, добра ведае, што трэба есці, каб жыць. Але ведае таксама, што гэтага недастаткова. Пасля памнажэння зямнога хлеба, Ён рыхтуе яшчэ большы дар: Ён сам становіцца сапраўдным хлебам і сапраўдным напоем. Дзякую, Пане Езу!”, - сказаў Папа.
“Нябесны хлеб, які паходзіць ад Айца – гэта Сын, які ўцелавіўся для нас. Гэта ежа, больш чым неабходная нам, бо яна суцяшае наш голад па надзеі, праўдзе і збаўленні, які мы ўсе адчуваем не ў страўніку, а ў сэрцы”, - дадаў ён, падкрэсліваючы, што Езус клапоціцца пра нашу самую вялікую патрэбу: Ён збаўляе нас, насычаючы наша жыццё сваім. “Дзякуючы Яму мы можам жыць у еднасці з Богам і паміж сабой. Такім чынам, жывы і сапраўдны хлеб – гэта не нешта магічнае, што ў адзін момант вырашае ўсе праблемы, а само Цела Хрыста, якое дае надзею бедным і перамагае пыху тых, хто аб’ядаецца за іх кошт”, - падкрэсліў Святы Айцец.
“Давайце спытаемся ў сябе, браты і сёстры: ці прагну я збаўлення толькі для сябе або і для ўсіх маіх братоў і сясцёр? Калі прымаю Эўхарыстыю, якая з’яўляецца цудам міласэрнасці, ці здольны я здзіўляцца Целу Хрыста, які памёр і ўваскрос дзеля нас?”, - прапанаваў задумацца Папа, заклікаючы таксама памаліцца Багародзіцы, “каб Яна дапамагла нам прыняць нябесны дар у знаку хлеба”.
