Пантыфік: хвароба не можа адлучыць нас ад любові і малітвы
Аляксандр Панчанка - Vatican News
“Сёння, у другую нядзелю Вялікага посту, Евангелле распавядае нам пра Перамяненне Езуса (Лк 9, 28-36). Узышоўшы на вяршыню гары разам з Пятром, Якубам і Янам, Езус занурыўся ў малітву і стаў выпраменьваць святло. Так Ён паказвае вучням тое, што схавана за жэстамі, якія Ён здзяйсняе сярод іх: святло Яго бясконцай любові”, - напісаў Папа.
“Я дзялюся з вамі гэтымі думкамі, калі перажываю час выпрабаванняў і далучаюся да шматлікіх хворых братоў і сясцёр, такіх жа нямоглых, як і я. Нашы целы слабыя, але, нягледзячы на гэта, нішто не можа перашкодзіць нам любіць, маліцца, ахвяроўваць сябе, каб жыць з верай адно для аднаго, будучы ззяючымі знакамі надзеі. Колькі святла ззяе ў гэтым сэнсе ў бальніцах і месцах, дзе даглядаюць хворых! Колькі любячага клопату асвятляе палаты, калідоры, клінікі, месцы, дзе здзяйсняюцца самыя сціплыя паслугі! Таму сёння я хачу запрасіць вас разам са мной праславіць Пана, Які ніколі не пакідае нас і Які ў часы смутку ставіць побач з намі людзей, якія адлюстроўваюць прамень Ягонай любові”, - заахвоціў Святы Айцец.
“Дзякую вам усім за малітвы і тым, хто дапамагае мне з вялікай адданасцю. Я ведаю, што многія дзеці моляцца за мяне; некаторыя з іх прыйшлі сёння сюды, у “Джэмэлі”, на знак блізкасці. Дзякуй вам, дарагія дзеці! Папа любіць вас і заўсёды чакае сустрэчы з вамі”, - запэўніў Францішак.
“Давайце працягваць маліцца за мір, асабліва ў краінах, параненых вайной: у змучанай Украіне, у Палесціне, Ізраілі, Ліване, М’янме, Судане, Дэмакратычнай Рэспубліцы Конга”, - заклікаў Папа.
“І давайце памолімся за Касцёл, пакліканы ператварыць у канкрэтныя рашэнні разважанні, зробленыя падчас нядаўняй Сінадальнай асамблеі. Я дзякую Генеральнаму сакратарыяту Сінода, які на працягу наступных трох гадоў будзе суправаджаць мясцовыя Касцёлы ў гэтай справе. Няхай Дзева Марыя абароніць нас і дапаможа нам быць, падобна Ёй, носьбітамі Хрыстовага святла і міру”, - завяршыў сваё нядзельнае разважанне Святы Айцец.
