Гістарычны візіт: Пантыфік упершыню ў Люксембургу
Аляксандр Амяльчэня - Vatican News
Папскі самалёт прызямліўся ў міжнародным аэрапорце Люксембург-Фіндэл раніцай 26 верасня 2024 года. Гэта першы візіт Пантыфіка ў Вялікае Герцагства за ўсю гісторыю дыпламатычных адносін паміж Святым Пасадам і Люксембургам.
Адразу пасля прызямлення на борт самалёта падняліся апостальскі нунцый у Люксембургу і кіраўнік пратакола краіны, каб павітаць Папу. Затым Святы Айцец спусціўся па спецыяльным ліфце і быў сустрэты ля трапа Вялікім герцагам Анры, Вялікай герцагіняй Марыяй Тэрэзай і прэм'ер-міністрам Люксембурга Люкам Фрыдэнам.
Цырымонія прывітання адбылася ў памяшканні насупраць галоўнай залы аэрапорта. Папа, вялікагерцагская пара і прэм'ер занялі месцы на спецыяльным подыуме, вакол якога сабраліся каля сотні маладых людзей. Прагучалі дзяржаўныя гімны, былі ўзняты сцягі, пасля чаго адбылося прадстаўленне афіцыйных дэлегацый.
Варта адзначыць, што гэты візіт носіць не толькі рэлігійны, але і дыпламатычны характар. Люксембург – адна з найменшых краін Еўропы, але яна мае вялікае значэнне як фінансавы цэнтр і месца размяшчэння некаторых інстытутаў Еўрапейскага саюза.
Пасля цырымоніі ў аэрапорце Францішак накіраваўся ў Вялікагерцагскі палац, дзе запланаваны сустрэчы з кіраўніцтвам краіны, прадстаўнікамі грамадзянскай супольнасці і дыпламатычнага корпуса.
Нягледзячы на кароткі тэрмін візіту, праграма Пантыфіка насычаная. Акрамя афіцыйных сустрэч, ён правядзе экуменічную малітву ў катэдры саборы Люксембурга і сустрэнецца з моладдзю краіны.
